Qazaqstanda 5 sáýirden bastap mopedterdi basqarýdyń jańa erejeleri kúshine endi.
Almatyda polısıa qyzmetkerleri jańa talaptardyń saqtalýyn tekserý, sondaı-aq zańnamanyń aldyn alý jáne túsindirý maqsatynda reıd ótkizdi, dep habarlaıdy aqshamnews.kz Polisia.kz-ke silteme jasap.
Polısıa qyzmetkerleri júrgizýshi kýáligin, mopedti tirkeýdi jáne dulyǵany paıdalanýdy tekserdi. Qujatsyz jáne qorǵanys quraldarynsyz motosıklderdi basqaratyn kámeletke tolmaǵan júrgizýshilerge erekshe nazar aýdaryldy.
— Biz bul reıdti aıyppul salý úshin ótkizip jatqan joqpyz. Bizdiń maqsatymyz — eskertý, túsindirý jáne jańa talaptarǵa beıimdelýge kómektesý. Ókinishke qaraı, sońǵy jyldary mopedter jol-kólik oqıǵalaryna jıi ushyraıdy. Júrgizýshiler arasynda kýáligi men dulyǵasy joq jasóspirimder jıi kezdesedi. Biz munyń qaıǵyly oqıǵamen aıaqtalýyn qalamaımyz. Polısıa ishki ister mınıstri jarıalaǵan aldyn alý jyly aıasynda áreket etýde. Biz qaýipsizdik pen tártipti jaqtaımyz jáne barlyǵyn – júrgizýshiler men jaıaý júrginshilerdi - Zańdy saqtaýǵa shaqyramyz, - dedi, Almaty qalalyq PD jergilikti polısıa qyzmeti basqarmasynyń bastyǵy Serik Shýmaev.
Jyl basynan beri Almaty joldarynda mopedterdiń qatysýymen 197 jol-kólik oqıǵasy boldy. Saldarynan 2 adam qaza taýyp, taǵy 203 adam ártúrli aýyrlyqtaǵy dene jaraqatyn aldy. — Bul statısıka ózi aıtyp tur. Jańa erejeler jaı ǵana formaldylyq emes. Bul joldardaǵy tártip pen ómirdi saqtaýǵa jasalǵan qadam. Adamdar erejelerdi saqtaýdyń mańyzdylyǵyn túsingenin qalaımyz, - dedi Serik Shýmaev. Bul baǵytta túsindirý jáne profılaktıkalyq jumystar áli de jalǵasyn tabady. Polısıa, ata-analardy motokólikti kimge senip tapsyrǵanyn baqylaýǵa shaqyrady jáne jol qaýipsizdigi - árbir adamnyń mindeti ekenin eskertedi!