Almatyda ótken «Mentaldy densaýlyq jáne COVID-19» konferensıasynda sarapshylar vaksınalaýdan bas tartý problemasy týraly óz oılaryn ortaǵa saldy, dep habarlaıdy Almaty-akshamy.kz
«V.M. Behterev atyndaǵy Ulttyq medısınalyq psıhıatrıa jáne nevrologıa zertteý ortalyǵynyń» psıhıatrıa jáne shekaralyq buzylýlardy emdeý bóliminiń bas ǵylymı qyzmetkeri Vsevolod Rozanovtyń aıtýynsha, stress jaǵdaıynda keıbir adamdarda fantasıkalyq nemese mıfologıalyq oılaý qabileti kúsheıedi.
«Árıne, vaksınaǵa qatysty qıyndyqtar bar, biraq biz tutas adamzat týraly oılanýymyz kerek. Qazir adam óziniń jaıly jaǵdaıynyń buzylmaýyn qalaıdy. Biraq biz egoızm, egosentrızm aýyr synaqqa ushyraǵan jaǵdaıǵa tap bolyp otyrmyz. Biz tabıǵattyń bir bóligi ekenimizdi, keıde onda ártúrli jaǵdaılar oryn alatynyn túsinýimiz qajet. Árdaıym eń nashar jaǵdaıǵa daıyn bolýymyz qajet. Men muny biz qazir osyndaı tendensıa júrip jatqanyn túsinýimiz úshin aıtyp otyrmyn», - dedi ol.
QazUMÝ rektory Talǵat Nurǵojın vaksınalaý mıllıardtaǵan adamnyń ómirin saqtap qalǵanyn atap ótti.
«Qazaqstanda vaksınalaýdyń arqasynda ómir súrý uzaqtyǵy 60 jastan 74 jasqa deıin uzardy. HHİ ǵasyrdyń kez kelgen ınovasıalyq tehnologıasy mıllıondaǵan adamnyń ómirin saqtaıdy. Biraq, vaksınalaý mıllıardtaǵan adamdy qutqarady. Bul vaksınanyń qandaı paıdasy bar ekenin túsiný úshin jetkilikti. Bizdiń ýnıversıtette oqytýshylar da, basqa qyzmetkerler men stýdentter de 100 paıyz ekpe saldyrdy. Biz olardy yntalandyrmadyq, biz dáriger retinde ózimiz úlgi kórsetsek, onda halyq senim bildiretinin túsinemiz. Osynda bilim alatyn balalardyń arqasynda 100 paıyz ekpe aldyq jáne oflaın rejımde oqyp jatyrmyz», - dedi ol.
Psıhıkalyq densaýlyq salasynda jumys isteıtin mamandar qaýymdastyǵynyń prezıdenti Saǵat Altynbekov vaksınalaý búkil adamzattyń ómir súrýi úshin qajet ekenin alǵa tartty.
«Ekpe saldyrý - álemdi aman alyp qalý úshin mindetti shart. Reseıdiń de, Qazaqstannyń da óz ekpesi bar, sóıtip, joly boldy. Bizde vaksınanyń 4 túri bar, olar tegin. Halyq ta buǵan úırendi. 4 mıllıon Pfizer vaksınasy satyp alyndy. Olar balalar men júkti áıelderdiń deni saý bolsyn degen maqsatta alyndy. Bul - bizdiń salyq tóleýshilerdiń aqshasy. Biz oǵan sanaly túrde baramyz. Táýelsiz Qazaqstannyń ómir súrýin qalasaq, onda memleket jasap jatqan barlyq ıgilikti durys qabyldaýymyz qajet», - dedi ol.
«Mentaldy densaýlyq jáne COVID-19» konferensıasynda Qazaqstan, Reseı, Túrkıa, Ózbekstan, Qyrǵyzstan, Ázirbaıjan, Tájikstan, Bolgarıa, Polsha jáne Lıtvanyń úzdik mamandary sóz sóıledi.
Atalmysh konferensıany Qazaqstan Respýblıkasy Densaýlyq saqtaý mınıstrliginiń psıhıkalyq densaýlyq ǵylymı-tájirıbelik ortalyǵy, Reseı Federasıasy Densaýlyq saqtaý mınıstrliginiń V.M. Behterev atyndaǵy psıhıatrıa jáne nevrologıa Ulttyq medısınalyq zertteý ortalyǵy jáne psıhıkalyq densaýlyq salasynda jumys isteıtin mamandar qaýymdastyǵy jáne QazUMÝ túlekteriniń qaýymdastyǵy birlesip uıymdastyrdy.