18 qazan - Dúnıejúzilik konfet kúni
Tátti dese, basqa astyń baryn ysyryp qoıatyn jandar qatarynan bolsańyz, merekelerińiz qutty bolsyn! Bul kúni táttige beıjaı qaraı almaıtyn jandardyń merekesi atalyp ótedi eken. Dúnıejúzilik konfet kúni súıikti konfetin jeý rahatynan bas tarta almaıtyn, sonymen birge, osy ónimderdi daıyndaý barysyna qatysy bar adamdardy biriktirgen.
Bireýler úshin konfet súıikti táttisi bolýy múmkin. Konfettiń de túr-túri bar, karamel, shokolad, muz kámpıtter, ırıster, t.b. dep dámine qaraı kete beredi. Al endi bir kisiler táttiden múlde bas tartyp, onyń densaýlyqqa keltirer zıanyn alǵa tartady. Degenmen, konfetten bas tartatyn balalar joq shyǵar.
Konfetter Ejelgi Mysyr dáýirinde paıda bolǵan degen pikir bar. Ol kezde bul tátti jańǵaq, bal jáne injirden daıyndalypty.
Konfetti qant qosyp ázirleý alǵash ret arabtardan shyqqan. Olardyń ázirlegen táttileri osy kúni de shyǵys táttileri dep jaqsy tanys.
Atap ótetin jaıt, adamdar táttiniń kóńil-kúıdi kóterip, sergektik syılaıtynyn burynnan baıqaǵan. Sonyń sebebinen, shokolad konfetter bir kezderi dárihanalarda satylatyn bolǵan. "Ázirlengen, daıyndalǵan" degenniń týra maǵynasy latyn tilinen aýdarǵada "konfet" degendi bildiredi. Dárihana satýshylary konfetti jótel men júıke júıesiniń buzylýyna qarsy qural retinde satqan. Búginginiń zertteýshiler de shokolad jegende baqyt garmony bólinedi degen tujyrym aıtady. Osylaısha, dárihanashylar engizgen "Konfet" termıni keıin kele kondıterlik ónimderdiń bir túrin bildiretin boldy.
Ótken ǵasyrda konfet jasaý isi ony jappaı óndirýge ákeldi. Bir jaǵynan, bul táttige degen qoljetimdilik jáne onyń baǵasyna qatysty máselelerdi sheshti. Alaıda sonymen birge tabıǵı ónim jasaýdyń shyǵarmashylyq barysy da joǵala bastady. Osy kúni konfet óndirisinde hımıalyq qospalar qoldanylady, ol qanttyń kóp bolýy men joǵary kalorıaly bolǵannan densaýlyqqa zıany da orasan. Osy kúni tátti ónimderden, onyń ishinde konfet túrlerinen jańylýǵa bolady. Olardyń túriniń kóptigi sondaı, táttiqumar jandar qatary da kóbeıe túsken. Konfet ónimderi damyǵan saıyn, odan keletin zıannyń saldarynan aýrý da soǵan sáıkes jasaryp, kóbeıip ketken.
Osy kúni kondıterler, óndirýshi kompanıalar, taýar belgileriniń ıeleri dúnıejúzilik konfet kúninen arnalǵan jyl saıynǵy sharalardan tys qalmaýǵa tyrysady.
Konfet merekesine oraı, qoldan konfet ázirleý boıynsha festıválder, karnavaldar, kórmeler, sheberlik saǵattary ótedi.