Áleýmettik jelilerde vaksına arqyly salynatyn chıpter talqylanyp jatyr.
Telegram arnasynyń paıdalanýshylary vaksınalarda mıǵa áser etetin chıpter bolatyny týraly habarlamany talqylaýda. Alaıda mamandar bul aqparatty joqqa shyǵardy, dep habarlaıdy Almaty-akshamy.kz tilshisi.
Mamandaryń atýynsha, mıǵa áser etetin chıpter tehnologıasy egeýquıryqtarda synalǵan, kemirgishterdi moıynsunǵysh etý arqyly ol oń nátıje bergen eken.
Qaznet paıdalanýshysy aıtyp otyrǵan tyshqandarǵa júrgizilgen tájirıbe shyn máninde ótkizilgen jáne baspasózde, onyń ishinde qazaqstandyq baspasózde keńinen jarıa etildi. Tájirıbeniń máni – tyshqandardyń mıyna Bluetooth sıgnaldaryn qabyldaýǵa jáne shyǵarýǵa, sondaı-aq, elektr jelisine qosylmaı qýat alýǵa qabiletti kishkentaı chıpterdi engizý. Bul rette mıkrochıptiń ózi jaryq shyǵardy.
Ǵalymdardyń pikirinshe, bolashaqta mundaı tehnologıa depressıany, Parkınson aýrýyn, ártúrli táýeldilikterdi jáne basqa aýrýlardy emdeýge múmkindik beredi.
Tájirıbe Nature Communications jýrnalynda egjeı-tegjeıli sıpattalǵan. Maqalada mıkrochıptiń ólshemderi uzyndyǵy 19 mm., eni 12 mm. jáne qalyńdyǵy 5-ke teń ekendigi aıtylǵan. Onyń salmaǵy 1,4 gram. Ol tyshqannyń terisin kesip, bas súıegin burǵylap tesý arqyly mıǵa engizilgen.
Bul adamǵa mundaı qurylǵyny vaksınasıa ınesiniń kómegimen engizý múmkin emes ekenin dálel deıdi. Qurylǵy tym úlken. Sonymen qatar, vaksınasıa kezinde ol mıǵa kire almaıdy, ıaǵnı ol múldem paıdasyz bolady.
Tájirıbe týraly maqalada adamdarǵa chıpti vaksınasıa túrinde engizý jaıly jazylmaǵan. Sondaı-aq, ǵalymdar adamdardy kóngish etýdi nemese olardyń erkin baǵyndyrýdy maqsat etpeıdi. Ázirlemeniń mindeti – búgingi kúni qıyn emdeletin aýrýlarmen kúresý jolyn tabý
Bul oraıda qazaqstandyq sportshylar ekpe alǵan durys degen pikir bildirip otyr.
«Biz sportshylar, indet ýaqytynda jalǵyz jattyǵýdan sharshadyq. Óıtkeni, regbı – komandalyq oıyn. Bizder ártúrli jarystarǵa qatysyp, jankúıerlerdiń qoldaýyn kórgimiz keledi. Al ol úshin vırýsty ómirimizden alastatyp, indetti túpkilikti joıýymyz qajet. Komandamyzdaǵy qyzdardyń ishinde eń birinshi bolyp men ekpe aldym. Keıinnen ekeýi, sosyn úsheýi vaksına alyp, komandanyń jartysyna jýyǵy vaksınalandy. Túgelimiz derlik ekpeni denemizge ektirgennen keıin ózimizdi qorǵanysta júrgendeı, vırýsty múldem juqtyrmaıtyndaı kúı keshtik. «Kóppen kórgen uly toı» demekshi, barsha ujym bolyp bir sheshim qabyldaýymyz aýyzbirshiligimizdiń belgisi deýge bolady. Úıimizdegi qart ata-anamyzdyń hal-jaǵdaıyna, densaýlyǵymyzǵa alańdaıtymyz ras bolsa, ekpeniń eki birdeı dozasyn qabyldaýymyz qajet», – deıdi Regbı boıynsha QR Ulttyq áıelder quramasynyń múshesi Daıana QAZYBEKOVA.
Vaksınanyń mańyzdylyǵy týraly «Azıa Sport» regbı klýbynyń oıynshysy Sergeı DENISÚK aıtyp otyr.
« Qalamyzǵa senimdi, qorǵanys áseri bar vaksına ákelingennen keıin ózim turatyn aýdanǵa qarasty ekpe egý pýnktine baryp, vaksına aldym. Karantın ýaqytynda súıikti isterimmen aınalysa almadym. Biraz ýaqyt úıde qamaldyq, tórt qabyrǵadan jalyǵyp ta kettik. Bul kezeń sportshylar úshin óte qıynǵa soqty. Aınalasy 4-5 aıdyń ishinde talaptardyń birazy jeńildep, jumyspen, sportpen qaýyshtyq. Ekpeniń adam ómirine zıan tıgizbeıtinin, kerisinshe vırýstyń jeńil ótýine septigin tıgizetinin estigende qýandym. Sebebi, meniń otbasym bar, balam ósip keledi, olardy indetten qorǵaý meniń ákelik mindetim. Ineksıa eshqandaı asqynýsyz ótti. Men barsha adamzat balasyna vaksına alýǵa keńes beremin. Óıtkeni, ekpe qalypty ómirge oralýǵa múmkindik beretin jalǵyz jol», – deıdi Sergeı DENISÚK.