Konkýrs qorytyndysy boıynsha barlyǵy 64 jeńimpaz anyqtalady.
Qazaqstan ustazdary arasynda ótip jatqan baıqaýdyń fınalyna qansha maman shyqqany belgili boldy, dep habarlaıdy Almaty-akshamy.kz.
«2022 jylǵy «Úzdik pedagog» ataǵyna 123 muǵalim úmitker. Olar baıqaýǵa qatysýshy 5,5 myń pedagogtiń arasynan iriktelip alyndy. Konkýrs qorytyndysy boıynsha barlyǵy 64 jeńimpaz anyqtalady. Olardyń barlyǵy 3 mln teńgeden (1 000 AEK) syıaqy alady», - delingen Oqý-aǵartý mınıstrliginiń baspasóz qyzmetiniń habarlamasynda.
Bıyl mınıstrlik sıfrlandyrý boıynsha aýqymdy jumys júrgizdi. Dálirek aıtqanda, baıqaýdyń barlyq kezeńi, ıaǵnı qatysýshylardy tirkeýden bastap, respýblıkalyq kezeńniń qorytyndysyn shyǵarýǵa deıin tolyǵymen sıfrlandyryldy. Sonyń arqasynda túsken ótinishter sany rekordtyq kórsetkishke (5,5 myńnan astam) jetti.
Qazir baıqaýdyń aqtyq synyna balabaqshalar men mektepterdiń 103 muǵalimi, kolejderdiń 20 muǵalimi qatysyp jatyr. Olar aýdandyq, qalalyq jáne oblystyq týrlardyń qorytyndysy boıynsha usynylǵan.
«Bıyl alǵash ret ótinimderdi qabyldaý, tirkeý, konkýrs qujattaryn tapsyrý, baǵalaý jáne apelásıa berý teachercontest.iac.kz portalynda júzege asyrylyp jatyr. Sondaı-aq ótinim berilgen sátten bastap barsha úmitker onlaın rejımde baıqaýdyń barlyq dınamıkasyn baqylaý múmkindigine ıe boldy. Iaǵnı qatysýshylar qaı kezeńde, olarǵa sarapshylar qandaı upaı berdi jáne t.b. baqylaı aldy. Bıyldyń taǵy bir jańalyǵy – áriptesterimiz konkýrs komısıasy baǵalaıtyn ashyq sabaqtar ótkizedi. Júlde qoryn da kóbeıttik. Osyndaı sharalardyń arqasynda qatysýshylar sany ǵana emes, olardyń sapalyq quramy da artyp keledi», - deıdi Oqý-aǵartý mınıstrligi Orta bilim komıtetiniń tóraǵasy Gúlmıra Kárimova.
Respýblıkalyq konkýrs komısıasynyń quramynda qoǵamdyq birlestikterdiń, úkimettik emes uıymdardyń, ata-analar qaýymynyń ókilderi, jýrnalıser, belsendi pedagogter, bilim jáne ǵylym qyzmetkerleriniń Qazaqstandyq salalyq kásipodaq uıymynyń ókilderi jáne t.b. bar.
«Úzdik pedagog» respýblıkalyq konkýrsy 2012 jyldan beri ótkizilip kele jatqanyn atap óteıik. Osy ýaqyt aralyǵynda mektepke deıingi jáne orta, tehnıkalyq jáne kásiptik bilim berý uıymdarynyń 600-ge jýyq muǵalimi «Úzdik pedagog» ataǵynyń ıegeri atandy.