2025 jyl – Jumysshy mamandyqtarynyń jyly bolyp jarıalandy. Bul sheshim – elimizdiń damýyna negiz bolatyn, qol eńbegimen el ıgiligine úles qosyp júrgen mamandardyń mártebesin kóterýge baǵyttalǵan. Sebebi bilim – el bolashaǵynyń irgetasy. Osy jolda aıanbaı eńbek etip, darynyn, shyǵarmashylyǵyn jáne bilimin ushtap júrgen jastar – qoǵam maqtanyshy.
Jyl saıyn elimizdiń ár óńirinde ótkiziletin «Úzdik 100 stýdent» jobasy – osyndaı belsendi, izdenimpaz jastardy anyqtaýǵa, olardyń eńbegin baǵalaýǵa arnalǵan ıgi bastama. Bıyl Qazaqstan Respýblıkasy Oqý-aǵartý mınıstrliginiń tapsyrmasy boıynsha Astana qalasynda respýblıkalyq deńgeıde atalmysh jobanyń baıqaýy uıymdastyryldy.
Bul konkýrs tek úzdik oqıtyndardy ǵana emes, sonymen qatar ǵylymı-zertteý jumystarymen aınalysatyn, qoǵamdyq sharalarǵa belsene qatysatyn, sport pen ónerde jetistikterge jetken jastardy da qamtıdy. «Úzdik 100 stýdent» ataǵy – qajyrly eńbek pen tabandylyqtyń jemisi.
Jobanyń basty maqsaty – jumysshy mamandyqtardyń, onyń ishinde aspazdyq, shashtaraz óneri, tigin isi syndy kásipterdiń bedelin arttyrý, sondaı-aq stýdentterdiń kásibı damýyna qoldaý kórsetý. Bıylǵy tizimge engen stýdentter – óz salasynda aıryqsha nátıje kórsetken jas mamandar.
Olardyń qatarynda Almaty sán jáne qyzmet kórsetý salasy kolej dırektorynyń tárbıe isi jónindegi orynbasary Omarova Kúnimaı Nurlybaıqyzynyń jetekshiligi men 3- baǵam stýdenti Orazbaev Aıbek Baǵlanuly da bar. Ol bul konkýrsqa úlken daıyndyqpen kelip, erekshe jobasymen kózge tústi. Aıbek óz jobasynda týǵan óńiri jaıly, iske asyrylyp jatqan bastamalar týraly, sondaı-aq ózi bilim alyp jatqan oqý orny men tańdaǵan mamandyǵy týraly keńinen baıandady. Baıqaýǵa qatysýdaǵy maqsaty men jetistikke jetý jolyn shynaıy túrde kórsete bildi.
Sonymen qatar, bul baıqaý oǵan úlken tájirıbe men tyń aqparattar alyp, kásibı ósý jolynda senimdi qadam jasaýǵa múmkindik bergenin atap ótti. Árıne, mundaı tabystar – stýdenttiń jeke eńbeginiń, ustazdarynyń qoldaýy men ata-anasynyń seniminiń nátıjesi. «Úzdik 100 stýdent» jobasy – jastardyń bilimge degen yntasyn arttyryp, jaýapkershilik pen senimdilikti qalyptastyrady. Mundaı baıqaýlar salaýatty básekelestik ornatýǵa, jas urpaqtyń óz áleýetin tolyq ashýǵa jol ashady.
Qorytyndylaı kele, bul joba – elimizdiń bolashaǵyn jasaqtaıtyn kóshbasshy jastardy tárbıeleýdiń, olardyń áleýetin qoldaýdyń jarqyn úlgisi. Osyndaı bastamalar Qazaqstannyń ıntellektýaldyq áleýetin kóterip, jastardyń qoǵamdaǵy rólin nyǵaıta túsedi. Ár mamandyq – tabysty bolashaqtyń bastaýy ekenin umytpaıyq.
Almaty sán jáne qyzmet kórsetý salasy koleji
Kitaphana meńgerýshisi Jandar Sáýle Ilıasqyzy