Kardıologıa jáne ishki aýrýlar ǵylymı-zertteý ınstıtýtynda 77, 76, 71 jastaǵy úsh pasıentke sońǵy býynǵy qolqa klapany ımplantasıalandy. Qolqa stenozy – egde jastaǵy adamdarda jıi kezdesetin júrek aqaýy, óte qaýipti dert, sebebi kenetten ólimge ákelýi múmkin, dep habarlaıdy aqshamnews.kz
71 jastaǵy naýqas áıel uzaq ýaqyt boıy – 7 jyldan beri gemodıalızde júr. Ol qolqa qaqpaqshasynyń stenozy, mıtraldy qaqpaqshanyń jetkiliksizdigi, júrektiń ıshemıalyq aýrýy, asqynýlardyń damý qaýpi óte joǵary arterıalyq gıpertenzıanyń 3-satysy, sozylmaly júrek jetkiliksizdigine shaldyqqan jáne 2024 jyldyń jeltoqsanynda ınfarktqa ushyraǵan. Oǵan bıylǵy qańtarda stent qoıyldy, biraq densaýlyǵy jaqsarmady, entigýi basylmady. Onyń jaǵdaıyn jeńildetý úshin dárigerler táýekelge baryp, oǵan ota jasaý qajet dep sheshti. Operasıa sátti ótti.
Sońǵy býynǵy qolqa klapanyn klınıkanyń ıntervensıalyq kardıologtary Sankt-Peterbýrg qalasy V.Almazov atyndaǵy UMZO rentgenhırýrgıalyq dıagnostıka men emdeýdiń ádisteri bólimshesiniń meńgerýshisi Dmıtrıı Zýbarevpen birge ımplantasıalady.
«Bul ota qolqa stenozy bar naýqastardy emdeýdegi mańyzdy qadam boldy jáne olardyń ómir súrý sapasyn jaqsartýǵa jańa múmkindikter ashty. Sońǵy býynǵy qolqa klapanyn ımplantasıalaý - mańyzdy jetistikterimizdiń biri. Densaýlyǵy men ómirin bizge senip tapsyrǵan pasıentterge jaqsy kútim men emdeýdi qamtamasyz etý úshin kardıologıaǵa ınovasıalyq tehnologıalardy úzdiksiz engizýdemiz», – deıdi Basqarma tóraǵasy Marat Pashımov.
Zamanaýı transkateterli qolqa klapany qolqa stenozyn emdeýge arnalǵan. Ol ornalasý dáldigimen erekshelenedi, bul koronarlyq arterıalarǵa kedergisiz qol jetkizýge múmkindik beredi.