Ustaz bolý – bala kezimdegi armanym.
Almaty qalasy Ahmet Baıtursynov atyndaǵy №139 mektep-gımnazıasynyń bastaýysh synyp muǵalimi Meıramgúl Begova ustaz bolýdy bala kúnnen armandaǵan. Bilikti maman oqýshylardy bilim nárimen sýsyndatyp, bolashaqqa jol kórsetý ustazǵa júktelgen úlken jaýapkershilik dep biledi. Ustazdar kúni qarsańynda Almaty-akshamy.kz tilshisi muǵalimmen áńgime órbitti.
Muǵalim Meıramgúl Gabdýldaqyzy ustazdyq úlken jaýapkershilikti júkteıtinin jáne adal shákirt tárbıeleý ustaz úshin úlken mártebe ekenin aıtady.
«Almatyda naǵashy apaılarym joǵarǵy oqý oryndarynda sabaq beredi. Bala kezimnen sol kisilerge eliktep óstim. Ustaz bolý – bala kezimdegi armanym. Sol armanym oryndalǵanyna qýanamyn. Ustaz bolý –úlken jaýapkershilik. Sizdiń aldyńyzda ómirge qushtar el bolashaǵy otyr. Aldyńa kelgen búldirshinderdiń bilimin arttyryp, izgilikke úıretý, adamgershiliktiń qadir-qasıetin túsindirý, bolashaqqa jol kórsetý ustazǵa júktelgen úlken jaýapkershilik ekenin túsinemin», - deıdi ol.
Ol shákirtteriniń bilimdi, adal bolyp ósýin ózine mártebe sanaıdy. Sondyqtan shákirtteriniń sapaly bilim alýy jolynda aıanbaı eńbek etýde.
«Oqýshy bilim nárimen sýsyndap, eńbekti aqtasa, adal shákirt bolyp tárbıelense – bul ustaz úshin úlken mártebe. Ustaz balaǵa – ata-ana, dos, janashyr, aqylshy, úlgi bolar tulǵa». – deıdi muǵalim.
Meıramgúl Gabdýldaqyzy Muhtar Áýezovtiń «Ustaz bolý óz ýaqytyńdy aıamaı, ózgeniń baqytyn aıalaý» degen sózi ustazdardyń eńbegine, sarqylmas qýatyna, qajymas qaıratyna bergen baǵa dep sanaıdy. Onyń aıtýynsha, ár adam pedagog mamandyǵyn ıgergenimen árkim ustazdyqty alyp júre almaıdy. Sondyqtan ol oqýshylaryn mamandyq tańdaýda árdaıym úlken jaýapkershilikpen qaraýǵa shaqyrady eken.
«Ustazdyń júris turysy, minez-qulqy tipti kıim úlgisi de balalarǵa úlgi. Bala aldyndaǵy ustazyna óziniń ómirdegi aınasyndaı qaraıdy», - deıdi M. Begova.