Respýblıkanyń basym bóliginde jaýyn-shashyn mólsheri normaǵa jýyq bolady.
Qazan – kúzden qys mezgiline kóshý ýaqyty. Qazirgi kezde aýa raıy óziniń tosynsyılaryna toly, ásirese soltústik aımaqtarda kóptegen jyldar boıy jınaqtalǵan málimetterge sáıkes boran bolýy, tipti qar jamylǵysynyń paıda bolýy múmkin, dep habarlaıdy Almaty-akshamy.kz 24.kz-ke silteme jasap.
Bir aıdaǵy ortasha aýa temperatýrasy eldiń kóp bóliginde kópjyldyq normaǵa jýyq bolady dep kútilýde: Mańǵystaý, Atyraý, Qyzylorda oblystarynda, Batys Qazaqstan, Aqtóbe oblystarynyń basym bóliginde, Túrkistan oblysynyń batys jartysynda, Qaraǵandy oblysynyń ońtústik-batysynda, Qostanaı oblysynyń ońtústiginde normadan 1° joǵary. Respýblıkanyń basym bóliginde jaýyn-shashyn mólsheri normaǵa jýyq bolady dep boljanýda. Mańǵystaý, Qyzylorda oblystarynda, Atyraý, Aqtóbe, Túrkistan, Jambyl, Almaty oblystarynyń basym bóliginde, Qostanaı oblysynyń ońtústik jartysynda, Qaraǵandy oblysynyń batysy men ońtústiginde, Shyǵys Qazaqstan oblysynyń ońtústik-batysynda normadan az jaýyn-shashyn kútiledi. Boljamǵa sáıkes, Reseıdiń eýropalyq aýmaǵy arqyly ótetin Skandınavıa men Barens teńiziniń aýdandarynan sýyq antısıklon, qazan aıynyń basynda respýblıkanyń batys jartysynda aýa raıyn qalyptastyrady. Qazaqstannyń soltústiginde, shyǵysynda, ońtústik-shyǵysynda jáne ortalyǵynda, kerisinshe, batys jáne ońtústik sıklondardyń jyrasynan jáne belsendi frontaldi bólikterdiń ótýinen jaýyn-shashyn boljanady (jańbyr, qar, tuman jáne kóktaıǵaq qubylystary) – Qazaqstannyń taýly aýdandarynda qatty jaýyn-shashyn bolýy múmkin. Aıdyń birinshi onkúndiginde soltústik-batys antısıklonnyń batys óńirlerge basyp kirýi, aýa temperatýrasynyń túnde 1-3 gradýs aıazǵa deıin, kúndiz +10+15°S deıin tómendeýine alyp keledi. Qazaqstannyń soltústik-batysynda, soltústiginde, shyǵysynda jáne ortalyǵynda aýa temperatýrasy túnde -5+5°S-tan -1-8°S-qa deıin, kúndiz +3+10°S-tan 0,+5°S-qa deıin tómendeıdi. Al birinshi onkúndiktiń ekinshi jartysynan bastap, respýblıkanyń basym bóliginde 10-12 gradýsqa deıin jylynady. Qazannyń ekinshi jáne úshinshi onkúndikterinde, Jerorta teńizi men Orta Azıa aýdandarynan ońtústik-batystan jyly aýa massalarynyń shyǵarylýymen, jekelegen kúnderi jylýdyń qysqa merzimdi tolqyny kútiledi. Respýblıkanyń ońtústik-batysynda, ońtústiginde, ońtústik-shyǵysynda +19+25°S deıin jylynady. Qazaqstannyń soltústik jartysynda aýa temperatýrasynyń túnde -4-10°S deıin, kúndiz -2+3°S deıin, ońtústik jartysynda – túnde -5+5°S deıin, kúndiz +7+12°S deıin tómendeýi boljanady.
Eskertpe: bir aıǵa arnalǵan konsýltasıalyq boljam, sınoptıkalyq jaǵdaıdyń ózgerýine qaraı túzetilýi múmkin jáne onkúndik boljamdarmen naqtylanatyn bolady.