Mektepke deıingi, orta, qosymsha, tehnıkalyq jáne kásiptik, orta bilimnen keıingi jáne joǵary bilim berý uıymdary úshin «Pedagogıkalyq ıdeıalar panoramasy-2024» respýblıkalyq beınesabaqtar men beınedárister konkýrsynyń óńirlik kezeńi bastaldy.
Konkýrs maqsaty – pánaralyq negizde bilim alýshylardyń erte/fýnksıonaldyq saýattylyǵyn damytý salasynda pedagogterdiń ózara qarym-qatynasynyń zamanaýı pedagogıkalyq tájirıbesi men úzdik praktıkalaryn taratý jáne tanymal etý, dep habarlaıdy Almaty-akshamy.kz Oqý-aǵartý mınıstrligine silteme jasap.
«Pedagogıkalyq ıdeıalar panoramasy» – bul elimizdiń barlyq óńirleriniń pedagogteri ınovasıalyq ıdeıalardy usynatyn, tájirıbe almasatyn jáne jańa praktıkalardy ıgeretin saraptamalyq alań. Konkýrs sıfrlyq tehnologıalardy belsendi qoldanýmen erekshelenedi. Bul óz kezeginde pedagogterdiń IT-quzyrettilik deńgeıine oń áser etedi. Bıyl «Pedagogıkalyq ıdeıalar panoramasy» 5-shi ret ótedi, pedagogterdiń konkýrsqa qyzyǵýshylyǵy jyl saıyn artyp keledi», – deıdi «Órleý» biliktilikti arttyrý ulttyq ortalyǵynyń basqarma tóraǵasy Elaman Aıbýldınov.
Konkýrstyń óńirlik kezeńine qatysýǵa ótinimder https://ppi.orleu-edu.kz saıtynda 24 sáýir–15 qazan aralyǵynda qabyldanady. Qosymsha aqparat alý úshin «Órleý» biliktilikti arttyrý ulttyq ortalyǵynyń oblystyq jáne Shymkent, Almaty, Astana qalalaryndaǵy fılıaldaryna habarlasýǵa bolady.