«Ustazym, ulaǵatym, úlgi-ónegem!». Almatyda №178 mamandandyrylǵan lıseıde Muǵalimder kúnine arnalǵan merekelik is-shara ótti.
Saltanatty jıynǵa bilim ordasynyń ulaǵatty ustazdary men oqýshylary qatysty. Shara barysynda lıseı dırektory Qaıratbek Shadıev áriptesterin kásibı merekemen quttyqtap, ustaz bolý – júrektiń batyrlyǵy, sezimniń aqyldyǵy ekenin jetkizdi.
«Eńbektiń eń úlkeni – bilim. Bilim – jalyqtyrmaıtyn jol, taýsylmaıtyn qazyna. Bilim berý salasynda kóptegen qıyndyqtar pen qyzyqtar kezdesedi, jaýapkershiligi aýyr júk dep sanaýǵa bolady. Biraq ol aýyrtpashylyq, qyzyqtar balalardyń kózindegi baqyt pen qýanyshty kórgen kezde umytylyp ketedi. Balalarmen balasha qýanyp, olardy jetistikke jetken kezde, olardyń úlken ómirge qadam basqan kezindegi mańyzdy sheshimderdi qabyldaýda seniń atqarǵan jumystaryńnyń nátıjesi retinde qaraýǵa bolady. Ustaz bolý – adamdyqtyń eń asyl qasıetteriniń biri. Sondyqtan ustazdardy ulyqtaý – úlken mártebe»,-dedi Qaıratbek Shádıev.
Kásibı merekede bilim jáne ǵylym salasyna súbeli úles qosyp, jas urpaqty bilim nárimen sýsyndatyp, ári ónegeli tálim-tárbıe berip júrgen pedagogtar túrli alǵys hattar jáne gramotalarmen marapattaldy. Ustazdyq etken, muratqa jetken jandar ulyqtaldy.
№178 mamandandyrylǵan lıseıde 1219 oqýshy bilim alyp jatyr, 133 muǵalim jumys isteıdi. Mundaǵy muǵalim-sheber, pedagog-zertteýshi biliktilik sanaty boıynsha ustazdar úlesi 80 paıyzǵa jetken. Sonyń ishinde 42 muǵalimniń «magıstr» dárejesi bar. Sońǵy úsh jylda 3 muǵalim respýblıka kóleminde «Úzdik pedagog» atanyp otyr. “Úzdik pedagog” baıqaýynyń jeńimpazdary G.Slámǵalıeva men T.Saǵıoldanov bıyl Fınlándıaǵa taǵylymdamaǵa bardy. 2016 jyly Almaty qalasy ákimdiginiń uıymdastyrýymen ótken baıqaýda lıseı «Eń úzdik mektep ujymy» ataǵyn jeńip alsa, 2020 jyly «Eń úzdik mektep» nomınasıasy boıynsha Almaty qalasy ákiminiń 34 mln grantyn utty. Sonymen qatar 2021 jyly «Eń úzdik kitaphana» baıqaýyna qatysyp, jeńimpaz atandy. Ózin-ózi basqarý uıymy boıynsha byltyr mektep oqýshylary úzdik atanyp, birinshi oryn ıelendi. Sońǵy jetistikterdiń biri – lıseı respýblıka kóleminde «Úzdik lıseı» nomınasıasy boıynsha birinshi oryndy jeńip aldy.
Merekelik sharada oqýshylar da shákirtter sanasyna bilim sáýlesin shashyp, ǵylymnyń shyraǵyn jaǵyp júrgen muǵalimderine aq tilekteri men jyly lebizderin bildirip, án men bıden shashý shashty.
Elmıra Rapılova 178 mamandandyrylǵan lıseıdiń
qazaq tili jáne ádebıeti pániniń muǵalimi