Ulttyq ulan ofıserleriniń komandırlik daıyndyq deńgeıin joǵarylatý, bólinisterdiń qyzmettik-jaýyngerlik mindetteriniń sapasyn arttyrý jáne batalón, rota býynyndaǵy sardarlardyń kásiptik sheberlikteri men ozyq tájirıbelerimen almasý maqsatynda 5571 áskerı bólim bazasynda uıymdastyrlǵan saıystyń ekinshi kezeńi aıaqtaldy.
Almaty qalasynynyń ózinen qatysqan jáne Shymkentten, Almaty, Jambyl, Qyzylorda, Jetisý oblystarynan at terletip kelgen 32 sardar memlekettik-quqyqtyq daıyndyq, qyzmettik-jaýyngerlik qoldaný taktıkasy, Qazaqstan Respýblıkasy Qarýly Kúshteriniń, basqa da áskerleri men áskerı qurylymdarynyń Jalpy áskerı jarǵysyn bilýden baq synasty.
Sondaı-aq, saıysqa qatysýshylar dene daıarlyǵynan 100 metr, 3 shaqyrym qashyqtyqqa júgirý jáne beltemirde tartylý, sonymen qatar saptyq daıyndyq pen Kalashnıkov avtomatyn ýaqytqa shashyp-jınaý, oqjatardy oqpen toltyrý jáne Makarov tapanshasynan atys jattyǵýlaryn oryndaý daıarlyǵy synaqqa tústi.
– Baıqaýdyń maqsaty – áskerı qyzmettiń mártebesin kóterý, ofıserlerdi yntalandyrý jáne olardyń kásibı sheberlikterin odan ári qaraı jetildirý, ozyq tájirıbelerdi taratý, batalón, rota býynyndaǵy ofıserlerden kadrlyq rezerv qurý. Baıqaýǵa kelgen barlyq ofıser tekserilgen pánder boıynsha joǵary daıyndyqtaryn kórsetti. Jeńimpazdar aldaǵy ýaqytta qyzmet baspaldaǵymen joǵary laýazymǵa taǵaıyndalýǵa úmitkerler qataryna qosylady, – deıdi Ulttyq ulannyń «Ońtústik» óńirlik qolbasshylyǵy qolbasshysynyń orynbasary polkovnık Konstantın Qýatov.
Saıys jeńimpazdary Keńes Odaǵynyń batyry, gvardıa polkovnıgi Baýyrjan Momyshuly atyndaǵy 5571 áskerı bóliminiń mádenı-demalys ortalyǵynda marapattaldy. Saıys nátıjesi boıynsha batalón býynynda «Úzdik batalón komandıri» bolyp 5513 áskerı bóliminiń batalón komandıri maıor Áset Orazbekov tanylsa, «Batalónnyń úzdik shtab bastyǵy» ataǵyn 5513 áskerı bóliminiń 2 jedel maqsattaǵy batalón shtab bastyǵy kapıtan Nursultan Pazılov jeńip aldy. Al «Batalónnyń úzdik tárbıeshisi» ataǵyna 5547 áskerı bóliminiń jedel maqsattaǵy batalón komandıriniń tárbıe jáne áleýmettik-quqyqtyq jumystar jónindegi orynbasary kapıtan Abylaıhan Tursynbaev qol jetkizdi. Sondaı-aq, rota ofıserleri arasynda 5514 áskerı bóliminiń jaýyngerlik qamtamasyz etý rotasynyń komandıri kapıtan Jalǵasbek Tataev «Úzdik rota komandıri», 5513 áskerı bólimi 3 rota komandıriniń orynbasary aǵa leıtenant Jasulan Azym «Rota komandıriniń úzdik tárbıe jáne áleýmettik-quqyqtyq jumystar jónindegi orynbasary», jáne 5514 áskerı bólimi avtomobıl vzvodynyń komandıri leıtenant Farhat Amangeldınov «Úzdik vzvod komandıri» atandy.
Endi olar Astanada Ulttyq ulan Bas qolbasshylyǵynda ótetin respýblıkalyq saıysta «Ońtústik» óńirlik qolbasshylyǵynyń namysyn qorǵaıtyn bolady.