Búgin Almatydaǵy Respýblıka saraıynda Ustazdar kúnine arnalǵan saltanatty shara ótti.
Almaty qalasynyń ákimi muǵalimderdi kásibı merekelerimen quttyqtady, dep habarlaıdy aqshamnews.kz
Merekelik jıynǵa qalamyzdyń ártúrli mektepterinde bilim berip júrgen 24,1 myń ustazdyń arasynan eńbek ardagerleri, ustazdyq áýlet ókilderi, jas urpaqqa bilim berip júrgen muǵalimder qatysty.
Almaty ákimi Erbolat Dosaev ustazdardyń eńbegin, jas urpaq tárbıesindegi úlesterin joǵary baǵalap, rızashylyǵyn bildirdi:
- Qurmetti ustazdar, Sizderdi kásibı merekelerińizben shyn júrekten quttyqtaımyn! Maǵjan Jumabaevtyń: «Alty Alashtyń basy qosylsa, tórdegi oryn – muǵalimdiki» degen sózi ustazdyń qoǵamdaǵy mártebesin joǵary baǵalap kórsetedi, - dedi ol. Búgingi merekede barshańyzǵa shyn júrekten alǵys aıtamyn. Sizderdiń kásibı sheberlikterińiz, tózimdilikterińiz jáne isińizge adaldyǵyńyz - biz úshin úlken maqtanysh. Shákirtterińizdiń jetistigi qýanta bersin, denderińizge saýlyq, ómirlerińizge baqyt, sarqylmas kúsh-qýat tileımin!
Ákim sózin jalǵaı otyryp, ustazdyq kásiptiń mártebesin arttyrýǵa baǵyttalǵan bastamalardy qoldaý jáne damytý jumystarynyń jalǵasyp jatqanyn aıtty. Ol bıyl 440 ustaz biliktilikti arttyrý baǵdarlamasynan ótetinin atap ótti. Sonymen qatar, 40 dırektor men ádisker jyl sońyna deıin Malaızıa, Qytaı, Germanıa jáne Polsha elderindegi jetekshi bilim berý mekemelerine taǵylymdamadan ótýge attanady.
«Almaty mektepteri» baǵdarlamasy aıasynda 70 ustaz Marshall Cavendish sertıfıkattalǵan baǵdarlamalary boıynsha oqyp, oqýshylardyń fýnksıonaldy saýattylyǵy men sıfrlyq daǵdylaryn damytýda. Buǵan qosa, 300 pedagog shetelde bilimderin jetildirip, 50 muǵalim osy jyldyń sońyna deıin Ońtústik Koreıada halyqaralyq taǵylymdamadan ótedi.
Ákim Erbolat Dosaev sóz sońynda «Almaty ustazy» qalalyq baıqaýynyń jeńimpazdaryn marapattady. Konkýrsqa qatysqan 2 myń ustazdyń arasynan úzdik dep tanylǵan 7 pedagog shetelde taǵylymdamadan ótý sertıfıkatymen marapattaldy, al Gran-prı ıegeri Ernur Beısembaev 5 mıllıon teńge kólemindegi sertıfıkatqa ıe boldy.
«Úzdik bilim berý uıymy» ataǵy Almaly aýdanynyń №15 gımnazıasyna berildi. Almaty ákimi mektep dırektoryna bilim berý prosesin jaqsartý úshin 68 mıllıon teńge kólemindegi grant tabys etti.
Sonymen qatar, 5 eńbek ardageri QR Oqý-aǵartý mınıstrliginiń «Eńbek ardageri» medalimen jáne qala ákiminiń bilim salasynyń damýyna qosqan erekshe úlesi úshin alǵys hattarymen marapattaldy.
Saltanatty sharanyń sánin opera sahnasynyń juldyzdary men tanymal estrada oryndaýshylarynyń óneri keltirdi.
