Jetisý aýdanyna qarasty Kemel yqshamaýdanynyń Mádenıet úıinde ótken merekelik sharaǵa jas otbasylar, aǵa býyn ókilderi, qoǵam qaıratkerleri jáne ónerpazdar qatysty.
İs-shara ákimdik pen áleýmettik mekeme ókilderiniń quttyqtaý sózderinen bastaldy.
Almaty qalasy Jetisý aýdany ákimdigi qoǵamdyq damý bóliminiń basshysy Rústem Ismaıylov turǵyndardy Otbasy kúnimen jáne aldaǵy qala kúnimen shyn júrekten quttyqtady. Sonymen qatar, ol Almaty qalasy ákiminiń orynbasary Azamat Qaldybekovtyń atynan «Mereıli otbasy» qalalyq baıqaýynyń jeńimpazdaryna alǵys hattar men estelik syılyqtar tabystady.
Almaty qalasynyń Jetisý aýdanynda turatyn Qanaevtar otbasy bıyl altyn toıyn – 50 jyldyq nekesin atap ótýde. Dál osy jup «Mereıli otbasy» qalalyq baıqaýynda ekinshi orynǵa ıe boldy. Baıqaýdyń maqsaty – otbasylyq qundylyqtardy nasıhattaý jáne qazaqstandyq otbasynyń oń beınesin qalyptastyrý. Ustaz ben qurylysshynyń mahabbatqa toly ádemi tarıhy myqty ári baqytty odaqqa ulasty. Orynsha men Nurǵalı Qanaevtar tórt qyz tárbıelep, toǵyz nemere súıip otyr.
– Tatýlyǵy jarasqan otbasynyń qupıasy qarapaıym: bir-birin tyńdaý, ózara túsinistik pen qurmet kórsetý jáne qatelikter úshin der kezinde keshirim suraý mańyzdy, – dep bólisti jup.
Otbasy kúni merekesi aıasynda kópbalaly analar da aýdan ákimdiginen maqtaý qaǵazdaryna ıe boldy.
Merekelik konserttik baǵdarlama kórermenderdiń kóńilinen shyqty. Sahnada ana týraly, mahabbat jaıly ánder shyrqalyp, «Kóńil ashar» kúıi oryndaldy. Belsendi uzaq ómir súrý ortalyǵynyń qyzmet alýshylary ulttyq bılerdi oryndap, kórermenderdi qýanyshqa bóledi.