Fly Arystan keı reısterdiń nelikten ushpaı qalǵanyn túsindirdi
Fly Arystan áýe kompanıasy 19 naýryz kúni birneshe reıstiń shegerilýine baılanysty jeli qoldanýshylarynyń shaǵymyna túsinikteme berdi, dep habarlaıdy Almaty-akshamy.kz.
Jeli qoldanýshylary 19 naýryzda Fly Arystan áýe kompanıasy qyzmet kórsetýge tıis bolǵan Nur-Sultan – Qostanaı reısinen sebepsiz túsirilgenin aıtyp shaǵymdanǵan bolatyn.
Áýe kompanıasy atalmysh shaǵym boıynsha pikir bildirdi.
QazAqparat joldaǵan saýalǵa bergen jaýabynda kompanıa ókilderi 19 naýryz kúni Nur-Sultan - Qostanaı baǵytyndaǵy KS 7341 reısi oryn sany shekteýli bortpen ushqanyn habarlady.
«Tehnıkalyq sebep boıynsha jáne basshylyqqa alynýǵa tıisti qujattarǵa sáıkes, atalǵan áýe kemesinde jolaýshylar sany boıynsha 110 oryndyq ýaqytsha shekteý qoıyldy. Mundaı sheshim qabyldanǵannan keıin kompanıa osy reıske bılet alǵan jolaýshylardyń bárine qońyraý shalyp, basqa kúnderdi usyndy. 19 naýryzda usha almaǵan jolaýshylarǵa basqa kúnderge qaıta brondaý usynyldy. Sondaı-aq qonaq úıden oryn, tamaq jáne transfer usynyldy. Qaıta brondaýǵa kelispegen jolaýshylarǵa áýe bıletiniń úsh ese qunyna teń vaýcher jazyldy», - delingen kompanıa jaýabynda.
Áýe kompanıasy ókilderi atalǵan olqylyq úshin jolaýshylardan keshirim suraǵanyn aıtyp otyr.
«Ushý qaýipsizdigi bizdiń basty basymdyq bolǵandyqtan, osyndaı sheshim qabyldandy», - deıdi FlyArystan mamandary.
Sondaı-aq, áýe kompanıasy Almaty-Oral baǵytyndaǵy reıspen bolǵan jaǵdaıǵa túsinikteme berdi.
Ushaq 26 naýryzda ushyp shyqqanymen, aýa raıynyń qolaısyzdyǵyna baılanysty Atyraýǵa qonǵan bolatyn.
«26 naýryzda Almaty-Oral baǵytynda ushyp shyqqan KSQ 7165 reısi Oral qalasyndaǵy qolaısyz meteojaǵdaılarǵa baılanysty Atyraý qalasyna qonǵanyn habarlaımyz. Reıs sol kúngi saǵat 14.30-ǵa qaldyryldy. Keıin reıs ýaqyty saǵat 21.00-ge deıin uzartyldy.Biraq aqyry toqtatyldy. Jolaýshylarǵa sýsyn men tamaq, jatar oryn usynyldy. Sonymen qatar, jolaýshylarǵa bılet qunyn satyp alǵan orynǵa qaıtaryp alýǵa bolatyny aıtylǵan», - delingen jaýapta.