Oqıǵa Spirit Airlines avıakompanıasynyń NK951 reısi Gaıtı astanasy Port-o-Prens qalasyndaǵy Týssen-Lývertúr halyqaralyq áýejaıyna qoný kezinde oryn alǵan. Airbus A320neo ushaǵy qonýǵa jaqyndap qalǵanda, áýe kemesine baǵyttalǵan oq ushaqtyń aldyńǵy bóligindegi qaptamany tesip ótip, kabına men joǵarǵy júk bóligine zaqym kelgen, dep habarlaıdy aqshamnews.kz.
Osy sátten keıin ushaq qaıta kókke kóterilip, Domınıkan Respýblıkasynyń Santágo qalasyndaǵy qosymsha áýejaıǵa qondy.
Atqylaý nátıjesinde bir bortserik jeńil jaraqat alyp, medısınalyq qyzmetkerlerdiń baqylaýyna alyndy. Jolaýshylardyń arasynda zardap shekkender týraly aqparat joq. Ushaq paıdalanýdan shyǵaryldy, al barlyq jolaýshylar men ekıpaj músheleri basqa ushaqpen otyrǵyzyldy.
Oqıǵa saldarynan Port-o-Prens áýejaıyna baǵyttalǵan barlyq reıster toqtalǵan.
Spirit Airlines kompanıasy oqıǵa boıynsha resmı málimdeme jasady. Onda reıs Fort-Loderdeılden (Florıda) Port-o-Prens qalasyna baǵyt alǵan kezde, ushaqtyń Santágo (Domınıkan Respýblıkasy) áýejaıyna qaıta baǵyttalǵany, tekserý kezinde ushaqtyń zaqymdanǵany, jáne bul zaqymdardyń atqylaýdan bolǵany múmkin ekeni aıtyldy. Kompanıa, sondaı-aq, bortseriktiń jeńil jaraqat alǵanyn jáne qazirgi tańda medısınalyq baqylaýda ekenin habarlady.
Pasajırlerdiń eshqaısysy jaraqat alǵan joq. Ushaqty paıdalaný toqtatylyp, jolaýshylar men ekıpaj basqa ushaqpen jetkiziletin bolady. Spirit Airlines kompanıasy qaýipsizdikke basa nazar aýdaryp, Port-o-Prens jáne Kap-Aıten áýejaılaryna qyzmet kórsetýdi ýaqytsha toqtatty.