Búgin Avstralıada Asia Pacific Screen Awards azıalyq bedeldi kınosyılyǵy óz jeńimpazdarynyń esimderin jarıalady.
Bıylǵy jyly úsh qazaqstandyq fılm – Asqat Kýchınchırekovtyń «Baýyryna salý», Darhan Tólegenovtyń «Aǵaıyndy» jáne Aısultan Seıitovtyń «Qash» kartınalary júldegerler qataryna endi. Aıta ketetin jaıt - úsh fılm de rejıserlerdiń debúttik jumystary, dep habarlaıdy Almaty-akshamy.kz Ulttyq kınony qoldaý ortalyǵynyń baspasóz qyzmetine silteme jasap.
Onyń ishinde eki fılm, atap aıtsaq, «Baýyryna salý» men «Aǵaıyndy» Mádenıet jáne aqparat mınıstrliginiń tapsyrysy boıynsha Ulttyq kınony qoldaý memlekettik ortalyǵynyń kómegimen túsirilgen.
«Baýyryna salý» «Úzdik jastar fılmi» nomınasıasynda jeńiske jetse, «Aǵaıyndy» kartınasynda basty rólderdi somdaǵan Aıbar Saly men Álisher Ismaılov «Úzdik jańa qoıylym» úshin júldege ıe boldy. Al «Qash» týyndysy «Úzdik operatorlyq jumys» nomınasıasynda marapatqa ıe boldy.
Al APSA-nyń bas júldesin «Úzdik fılm» nomınasıasynda áıgili nemis rejıseri Vım Venderstiń «Prekrasnye dnı» atty japondyq kartınasy jeńip aldy. Bıylǵy jyly «Sandens» jáne Berlın kınofestıvaline qatysqan, festıvaldardyń hıty bolǵan «Proshlye jıznı» fılmi Selın Sonǵa eń úzdik rejıser ataǵyn ákeldi. Keshtiń taǵy bir favorıti Rúsýke Hamagýtıdiń «Zla ne sýshestvýet» japondyq dramasy qazylar alqasynyń Gran-prıine qol jetkizdi.
«Baýyryna salý» fılmi sábı kezinen ájesiniń tárbıesinde bolǵan balanyń oqıǵasyn baıandaıdy. Týyndynyń tusaýy osy jyly Ispanıanyń San-Sebastán qalasynda ótken bedeldi kınofestıvalde kesildi, onda ol «Jańa rejıserler» baǵdarlamasynda kórsetildi.
«Aǵaıyndy» fılmi ótken jyldyń qyrkúıeginde Germanıadaǵy Oldenburg International Film Festival festıvalinde "Kıno rýhy" syılyǵyn jeńip alǵan bolatyn, al osy jyldyń sáýir aıynda Qazaqstannyń kınosynshylar qaýymdastyǵy bul kartınany 2022 jyldyń "Úzdik dramasy" dep tanydy. Sonymen qatar, "Aǵaıyndy" – Italıa, Reseı, Ózbekstan, Qytaı, Ispanıa jáne Bolgarıadaǵy halyqaralyq kınofestıvalderde 10 marapatqa ıe boldy.
«Qash» fılmi qazaq dalasyndaǵy 30-shy jyldardaǵy asharshylyq kezindegi halyqtyń qıyn taǵdyry týraly baıandaıdy. Qabir qazýshy Isataı óz aýylyn qutqarý úshin qaýipti mısıaǵa barady, biraq jolda oǵan kezbe adam kezdesip, ony adastyrady. Aıta ketsek, Aısultan Seıitov jazda Shanhaı halyqaralyq kınofestıvalinde osy jumysy úshin «Úzdik rejıser» nomınasıasyn jeńip aldy.
APSA syılyǵy 2007 jyly IýNESKO men FIAPF - halyqaralyq kınoprodúserler qaýymdastyǵynyń kómegimen Avstralıa Úkimetiniń bastamasymen qurylǵan. Ol jyl saıyn halyqaralyq marapattar arasynda mańyzdy oryn alýda jáne kınematografıalyq álemde «Azıalyq Oskar» dep atalady.
Syılyq jyl saıyn Azıa-Tynyq muhıty aımaǵynyń 70-ten astam eliniń ókilderi jasaǵan eń kórnekti kartınalardy atap ótedi. Ótken jyldar jeńimpazdarynyń qatarynda 2019 jyly «Úzdik rejıser» nomınasıasynda jeńiske jetken belgili qazaqstandyq rejıser Ádilhan Erjanov bar.