Bıyl 3 myń qazaqstandyq áskerı jıynnan ótedi.
Qarýly kúshter Bas shtaby bastyǵynyń orynbasary general-maıor Sáken Júsipovtiń aıtýynsha, 3 jáne odan da kóp balasy bar jıynǵa shaqyrýdan bosatylady, dep habarlaıdy Almaty-akshamy.kz
Spıkerdiń aıtýynsha, áskerı jıynnyń negizgi maqsaty – beıbit ýaqytta qysqartylǵan sanda ustalatyn áskerı bólimderdiń jaýyngerlik jáne jumyldyrý daıyndyǵyn arttyrý, sonymen qatar jumyldyrý jaǵdaıynda Qarýly kúshter quramyn keńeıtý úshin qajetti zapastaǵy áskerı-oqytylǵan resýrstardy daıarlaý jáne jınaqtaý.
General-maıor Sáken Júsipov 30 kúnge sozylatyn áskerı jıyn jyl saıyn ótkiziletinin aıtty. Ótken jyly oǵan 1500 adam qatyssa, bul joly olardyń sany eki ese artty.
«Áskerı jıynǵa shaqyrylatyndar sanynyń artýy áskerı-eseptik mamandyqtar boıynsha daıarlaý jolymen áskerı oqytylǵan rezervti jınaqtaý qajettiligine baılanysty. Áskerı jıynǵa qatysý áskerı mindettilerdiń bilimin ózektendirýge jáne olardyń áskerı istegi daǵdylaryn qalpyna keltirýge múmkindik beredi», - dedi ol.
Sáken Júsipovtyń usynǵan aqparatyna sáıkes, jıynǵa qatardaǵy jaýyngerler men serjanttyq quram ókilderi 50 jasqa deıin, al ofıserler 60 jasqa deıin shaqyrylady. Egis jáne egin jınaý jumystary kezeńinde aýyl sharýashylyǵynda jumys isteıtin adamdar, oqý jyly ishinde kúndizgi oqý nysanyndaǵy bilim berý uıymdarynyń pedagogteri, 18 jasqa deıingi úsh jáne odan da kóp balasy bar adamdar áskerı jıynǵa shaqyrýdan bosatylady. Odan bólek azamattar shaqyrylǵanǵa deıin mindetti túrde medısınalyq komısıadan ótýi tıis.
Áskerı jıynǵa shaqyrylǵan azamattar áskerde qyzmet etetin áskerı qyzmetshilermen teń dárejede zattaı múlikpen, tamaqpen jáne medısınalyq qyzmet kórsetýmen qamtamasyz etiledi.
Áskerı jıyn ýaqytynda áskerı mindettilerdiń jumys orny men atqaratyn laýazymy saqtalady, ıaǵnı olarǵa ortasha jalaqy, al jumys istemeıtinderge memleket esebinen eń tómengi 85 myń teńge jalaqy tólenedi.
Áskerı mindettilerdi jıynǵa jetkizý jáne keri qaraı tasymaldaý Qorǵanys mınıstrliginiń qarajaty esebinen temirjol jáne avtomobıl kóligimen júrgiziledi. Jıyn oqý polıgondarynda ótkiziledi. Onyń barysynda áskerı mindettilerdi dalalyq lagerge ornalastyrady.
Bas shtab bastyǵynyń orynbasary áskerı jıynǵa shaqyrylǵan áskerı mindettiler áskerı qyzmetshi mártebesine ıe bolatynyn jáne kazarmalyq jaǵdaıda turatynyn da atap ótti. Olardy bólimniń ornalasqan jerinen bosatýdy ishki qyzmet jarǵysynda belgilengen erejege sáıkes jıyn bastyqtary júrgizedi.