Naǵyz qaharmandyq áreket
Ertis óńiriniń turǵyny, sýǵa batyp kete jazdaǵan úsh balany qutqarǵan Andreı Karandashov marapatqa ıe boldy, dep habarlaıdy Almaty-akshamy.kz BAQ.KZ-ke silteme jasap. 33 jastaǵy Andreı Karandashov Aqtoǵaı aýdany Prırechensk aýylynyń týmasy. Demalys kúni ózenge balyq aýlaýǵa barǵanda sýǵa batyp bara jatqan úsh balany kórgen.
«Qarmaǵyma balyq túspedi. Úıge qaıtaıyn dep jatqanda, úsh balaǵa kózim shaldy. Aıqaılap edim, jaýap bolmady. Sol sátte olardyń es-tússiz bolǵanyn bildim. Olar jaǵadan 10 metrlik jerde qalqyp jatty. Úshinshi bala sý túbine túsip ketipti. Abyroı bolǵanda, ustap alyp, shyǵardym. Eki ul bala esin birden jınady, úshinshi balaǵa jasandy demalý men júrek massajyn jasadym. Aǵaıyndy balalarda kezek kezek jaǵaǵa shyǵardym», - deıdi Andreı Karandashov.
Búginniń batyry atanǵan Andreı oblys basshylyǵy men tótenshe jaǵdaılar mınıstrligi tarapynan marapattarǵa ıe boldy. Eń bastysy, úsh balaqaıdyń ata-anasynyń zor alǵysyn arqalady. Oblys ákimi Ábilqaıyr Sqaqov aqtoǵaılyq azamatqa týǵan aýylynan úsh bólmeli páterdiń kiltin tabystady. Sonymen qatar, «Oblys aldynda sińirgen eńbegi úshin» tósbelgisi tabys etildi.
«Bul shyn máninde erlik emes, biz úshin baǵa jetpes jáne siz qutqarǵan balalar úshin asa mańyzdy naǵyz qaharmandyq áreket. Men óńirimizde siz sıaqty azamattar bolǵany úshin maqtanamyn. Ata-anańyzǵa ózińizdeı elimizdiń adal azamatyn tárbıelegeni úshin kóp rahmet. Sizge óńir turǵyndarynyń atynan alǵys aıtamyn», - dedi aımaq basshysy Ábilqaıyr Sqaqov.
Andeı Karandashovtyń eki balasy bar. Aýyl sharýashylyǵy salasynda eńbek etedi. Buǵan deıin jaldamaly úıde turǵan. Endi óz páterinde turatyn bolady. Aıta keteıik, bul – aqtoǵaılyq turǵyn jasaǵan alǵashqy erlik emes. Buǵan deıin, bala kezinde segiz jasar jetkinshekti de qutqaryp qalǵan.