Aqmola oblysyna qarasty Sandyqtaý aýdanyndaǵy úsh birdeı aýyldyń ataýy bıyl qazaqshalanady
Osylaısha, Keńes kezindegi eski ataýmen atalyp kele jatqan eldi mekender jańasha sıpatqa ıe bolmaq, dep habarlaıdy Almaty-akshamy.kz.
Bul ózgeristi jergilikti turǵyndar tolyq qoldaǵan. Aıta keteıik, aımaqta aldaǵy jyldary 100-den astam eldi mekenniń ataýy ózgeredi degen jospar bar.
Aımaqqa halqynyń uıymshyldyǵy jáne bereke-birligimen tanymal Krasnaıa polána aýyly bıyl aqmolalyqtardy taǵy bir jaǵymdy jańalyǵymen qýantty. Olar qatar qonǵan úsh aýyldyń ataýyn qazaqshalamaq. Jańadan tańdalǵan ataýlar da maǵynaly ári ádemi estiledi.
«Krasnaıa polána bizdiń ortalyǵymyz ári bereke-birligimizdiń nyshany bolǵandyqtan biz ony Birlik dep ataýdy jón kórdik. Al Petrıkovka – Tumar, Arbýzenka – Aqkent bop ózgeredi. Barlyǵy da halyqpen keńese otyryp tańdaldy. Bul kezinde ata-babalarymyzdy baýyryna basqan qazaq halqyna degen qurmetimiz jáne otansúıgishtigimizdiń belgisi dep bilersizder», - dedi Birlik aýyldyq okrýginiń ákimi Ansar Ibaev.
Atalǵan úsh aýylda 1 myńnan astam halyq turady. Olardyń 99 prosenti ıngýshtar men sheshender. Aýyldyqtardyń negizgi kásibi mal sharýashylyǵy. Munda 6 iri seriktestik pen 40 shaqty sharýa qojalyǵy bar.
Bir sózben aıtsaq, jumyssyz júrgen adam joq. Al Birlik aýyldyq okrýgi aqsaqaldar alqasy bar oblystaǵy saýsaqpen sanarlyq eldi mekenderdiń biri. Sondyqtan munda qandaı másele bolmasyn qarıalardyń qaraýynan ótedi.
«Aýyldyń ataýyn ózgertý degen osydan 30 jyl buryn bolýy tıis shara edi. Biraq sáti bıylǵa kelgen eken. Áli de kesh emes. Halyqtyń bári qoldap otyr. Biz bul máseleni sońǵy ret 2015 jyly bir kótergenbiz. Alaıda ataýlardy aýystyrýǵa moratorıı jarıalanyp, bastamamyz sol kúıi qalyp qoıǵan bolatyn. Endi bizdegi oń ózgerister basqa aýyldarǵa da úlgi bolsa deımiz», dedi Krasnaıa Polána aýylynyń turǵyny Magýmad Ýmarov.
Jergilikti ákimdik aýyldardyń ataýyn ózgertip ǵana qoımaı, olardy ajarlandyrýǵa da myqtap kirisken. Máselen, ótken jyldary munda eldi mekenderdiń jaryq jelisi jańartylsa, aldaǵy jyldary aýyz sý qubyry tartylyp, kósheler kúrdeli jóndelmek. Osylaısha oblys ortalyǵynan 150 shaqyrym jerde jatqan aýyldyqtar «Jańa Qazaqstanǵa» tolyq daıynbyz» dep ázildeıdi.