Qurmanǵazy atyndaǵy qazaq ulttyq halyq aspaptar orkestri 90-shy konserttik maýsymyna aıaq basty.
Almaty qalasynyń Óńirlik komýnıkasıalar qyzmetiniń alańynda osy oqıǵaǵa arnalǵan brıfıń ótti, dep habarlaıdy Almaty-akshamy.kz.
Qurmanǵazy atyndaǵy Qazaq ulttyq halyq aspaptar orkestriniń dırektory Medet Qýanyshev kúı men ulttyq aspaptar naǵyz qazaqtyń ishki jan-dúnıesin naqty bere alady deıdi.
Qurmanǵazy atyndaǵy qazaq ulttyq halyq aspaptar orkestri ótken ǵasyrdyń 30-jyldary negizi qalanǵan. Bastapqyda dombyra ansambli bolyp qurylǵan óner oshaǵy búginde álemge áıgili orkestrge aınalyp úlgerdi. Qazaq mýzykasynyń tarıhyndaǵy alǵashqy orkestrdiń negizin qalǵan Qazaqstannyń halyq ártisi, kompozıtor, akademık, profesor, tuńǵysh kórkemdik jetekshisi jáne bas dırıjeri Ahmet Jubanov.
Orkestrdiń qurylǵanyna 10 jyl ótkende 1944 jyly urpaqqa óshpes mýzykalyq jaýharlar qaldyrǵan qazaqtyń uly kompozıtory Qurmanǵazy Saǵyrbaıulynyń esimi berilgen.
Qurmanǵazy orkestri – Qazaq mýzykasynyń tarıhyndaǵy aspaptyq mýzyka óneriniń tuńǵysh ári biregeı óner oshaǵy. Búginde ataqty orkestrde 80-ge jýyq talantty artıs qyzmet atqarýda, orkestrdiń repertýarynda 4000-nan astam shyǵarma bar.
Qurmanǵazynyń shyǵarmalary jáne Ulttyq orkestr arqyly kúlli álem qazaqtyń mádenıetin, salt-dástúrin, mýzykalyq mádenıetin, jan dúnıesin tanýda. Al orkestrdiń repertýary qazirgi zaman kompozıtorlarynyń, sonyń ishinde shetel kompozıtorlarynyń jańa týyndylarymen tolyqtyrylǵan.
«Bıyl Qurmanǵazy babamyzdyń týǵanyna 200 jyl. 20 qańtarda Ulttyq orkestr elimizde alǵashqy bolyp Qurmanǵazynyń 200 jyldyǵyna arnalǵan is-sharalardyń shymyldyǵyn ashty. Bıylǵy jyl barlyq sharalar Qurmanǵazy babamyzdy eske alýǵa arnalady», – deıdi orkestr dırektory Medet Qýanyshev.
Sondaı-aq, orkestr basshysy 2022 jyly Qurmanǵazy orkestriniń gastróldik saparmen Astrahan jáne Qazanǵa, kúı atasynyń kesenesine baryp qaıtqanyn aıtty.
Ústimizdegi jyldyń maýsym aıynda M.Áýezov atyndaǵy Qazaq ulttyq drama teatrynyń ujymymen «Qurmanǵazy» konsert-spektakl birlesken jobasyn júzege asyrýdy josparlap otyr. Sonymen qatar, qazan aıynda orkestrdiń uıymdastyrýymen respýblıkalyq ulttyq aspaptar konkýrsy ótedi.
«Maýsym aıynda Qurmanǵazy orkestri Italıaǵa gastróldik saparǵa attanady, atalmysh gastróldik saparlarymyz da Qurmanǵazy babamyzdyń rýhyna arnalady. El tóńireginde, onyń ishinde Jambyl, Qyzylorda oblystaryna is-saparǵa shyǵamyz. Bıyl Atyraýda Qurmanǵazynyń 200 jyldyǵyna arnalǵan festıválde alǵashqylardyń biri bolyp óner kórsetemiz. Budan bólek, alǵa qoıǵan josparlarymyzdyń qatarynda – áıgili «Adaı» jáne «Saryarqa» shyǵarmalary týraly beınebaıan túsirý», - dep sózin jalǵastyrdy orkestr dırektory.
Qazaq ulttyq halyq aspaptar orkestriniń bas dırıjeri Abylaı Tilepbergen ujymnyń 90-shy konserttik maýsymǵa aıaq basqanyn aıtty. Ulttyq mýzykany qadir tutatyn jandar úshin orkestrdiń daıyndaǵan iri kólemdegi shyǵarmalary baryn da tilge tıek ete otyryp, óner ujymy ártisteriniń sońǵy jetken jetistikterimen de bólisti.
«Álemdik baıqaýda qobyzshylarymyz Ásel Rahymjan men Zaıragúl Súıekenova bas júldeni jeńip aldy. Qobyz áýenderi álemdik klasıkalyq repertýarǵa enýde. Qobyz búginde barlyq halyqaralyq sahnalarda óz tyńdarmandaryn tabýda, tipti, Mosart pen Bethoven shyǵarmalaryn da qobyzǵa salyp ońaı oryndaýǵa bolady», – deıdi Abylaı Tilepbergen.
Jýrnalıserdiń suraqtaryna jaýap bergen dırıjer orkestrdiń áleýmettik jelilerde belsendi jumys atqarýynyń arqasynda búginde jastardyń da halyq ánine bet burǵanyn atap ótti.
Brıfıńtiń taǵy bir qatysýshysy, Qurmanǵazy atyndaǵy qazaq ulttyq halyq aspaptar ártisi, dombyrashy Saǵdat Aqjolova búginde orkestr repertýarynyń keńeıip kele jatqanyn aıtty.
Sondaı-aq, orkestr baǵdarlamasyndaǵy álemdik tanymal klasıkalyq týyndylardy 27 qańtar kúni saǵat 19.00-de tyńdaýǵa bolady.