Qarýdy óz erkimen tapsyrǵandardyń áreketterinde basqa da qylmys quramy bolmaýy kerek.
Tártipsizdik kezinde urlanǵan qarýdy óz erikterimen tapsyrǵan adamdar qylmystyq jaýaptylyqtan bosatylady, dep habarlaıdy Almaty-akshamy.kz
«Quqyq qorǵaý organdary qylmystyq isterdi tergeýmen qatar, urlanǵan qarýdy izdeý jáne olardy tárkileý jumystaryn jalǵastyrýda. İshki ister mınıstrliginiń ókili aıtqandaı, qarýlardy óz erkimen tapsyrý múmkindigi bar. Óz kezeginde Bas prokýratýra zańsyz saqtalǵan qarýlardy, oq-dárilerdi, jarylǵysh zattardy óz erikterimen tapsyrǵan adamdarǵa qylmystyq jaýaptylyqtan bosatý kepilin beredi», - dedi Eldos Qılymjanov.
Onyń aıtýynsha, qarýdy óz erkimen tapsyrǵandardyń áreketterinde basqa da qylmys quramy bolmaýy kerek.
«Sonymen qatar azamattardyń nazaryna aıta ketetin jáıt, adam qarýmen júrip, quqyq qorǵaý organdaryna ustalsa, ondaı jaǵdaı óz erkimen qarýdy tapsyrý dep tanylmaıdy. İshki ister organdaryna zańsyz aınalymnan atys qarýlaryn alý boıynsha jedel izdestirý jáne profılaktıkalyq is-sharalardy jandandyrý týraly tapsyrma berildi», - dedi Bas prokýratýranyń ókili.
Budan buryn habarlanǵandaı, tártipsizdik kezinde qarýdy urlaǵany úshin 98 adam ustalyp, ýaqytsha ustaý abaqtysyna qamaldy jáne olardy zańsyz saqtaǵany úshin 61 adam ustaldy.
«Tártipsizdik kezinde 7 ańshylyq dúkenge shabýyl jasalyp, tonaldy. Olardan 1 564 azamattyq qarý urlandy», - dedi QR İİM Tergeý departamentiniń bastyǵy Sanjar Ádilov.