Tótenshe jaǵdaıdyń alǵashqy kúnderi Almatynyń medısınalyq uıymdary qalaı jumys istedi?
Almaty qalalyq qoǵamdyq densaýlyq saqtaý basqarmasy tótenshe jaǵdaıdyń alǵashqy kúnderinde "jedel járdem" qyzmetiniń jumysyn kórsetti, dep habarlaıdy Almaty-akshamy.kz
Jappaı tártipsizdikter bolǵan kúnderdegi vıdeolardan qıraǵan qalany, №7 qalalyq klınıkalyq aýrýhananyń shaǵylǵan terezeleri men synǵan esikterin, "jedel járdem" kóligine jasalǵan shabýyldy, sondaı-aq jaralanǵan adamdardy kórýge bolady.
№7 qalalyq klınıkalyq aýrýhana qyzmetkerleriniń biri 5 qańtar kúni keshki ýaqyttan bastap 8 qańtar túski deıin jaǵdaıdyń qıyn bolǵanyn aıtty. Agressıvti top aýrýhana aýmaǵyna basyp kirip, esik pen terezelerdi syndyryp, oq jaýdyrǵan.
«Naýqastar jatqan jansaqtaý bólimine qaraı oq atyldy. Bizdiń qyzmetkerlerge de qaýip tóndi. Biz búlikshiler emdelýshiler men qyzmetkerlerdi kepilge alma ma dep qoryqtyq», - deıdi aýrýhana qyzmetkeri.
Almaty qalalyq "jedel járdem" qyzmeti dırektorynyń orynbasary Andreı Lojkın 4 qańtar kúni keshki ýaqytta qyzmet ekstremaldy rejımde jumys isteı bastaǵanyn aıtty.
«Qyzmetkerler qatty qoryqty. Sonyń kesirinen búginde olardyń kóbi jumysqa shyqpaı otyr. Basym bóligi baqylaý-ótkizý beketterinen óte almaıdy. Biraq "jedel járdem" qyzmeti óz jumysyn atqaryp jatyr. Búginde 187 brıgadanyń shyǵýyn qamtamasyz etip otyrmyz. Sondaı-aq, jedel bólim de shtattyq rejımde jumys istep tur. Shaqyrtýlardy qabyldaıtyn qyzdarǵa qosymsha júkteme júkteldi. Olar qońyraý shalýshynyń daýysyna, ıntonasıasyna erekshe nazar aýdarýlary kerek. Iaǵnı, sóılegen sózi men daýysy arqyly onyń qanshalyqty qaýipti adam ekenin anyqtaımyz», - dedi ol.