Almaty oblysyndaǵy «Jaǵalaý» oqý-jattyǵý polıgonynda UQSH-nyń «Myzǵymas baýyrlastyq-2024» Ujymdyq bitimgerlik kúshterimen komandalyq-shtabtyq oqý-jattyǵýǵa daıyndyq jalǵasýda.
Oqý-jattyǵý jetekshisi – Qazaqstan Respýblıkasy Qarýly kúshteri Desanttyq-shabýyldaý áskerleriniń qolbasshysy general-maıor Almaz Jumakeev, dep habarlaıdy aqshamnews.kz Qorǵanys mınıstrligine silteme jasap.
UQSHU-ǵa múshe elderden – Belarýs, Qyrǵyzstan, Reseı jáne Tájikstannan áskerı quralymdar 26-30 qyrkúıek aralyǵynda keledi. Olardy qaıta toptastyrý áskerı-kóliktik avıasıa bortymen jáne avtomobıl kóligimen júzege asyrylady.
– Oqý-jattyǵý Ujymdyq qaýipsizdik júıesin nyǵaıtýǵa jáne UQSHU jaýapkershilik aımaǵynda turaqtylyqty qamtamasyz etýge baǵyttalǵan. Birlesken manevrler dostas elderden kelgen jattyǵýlarǵa qatysýshylarǵa úılesimdilikti, praktıkalyq daǵdyny arttyrýǵa jáne dalalyq mashyqty nyǵaıtýǵa múmkindik beredi. Praktıkalyq is-qımyl barysynda daǵdarys aımaǵyn shıelenisten keıingi retteý jáne gýmanıtarlyq kómek kórsetý jónindegi bitimgerlik operasıasy pysyqtalatyn bolady, – dedi general-maıor Almaz Jumakeev.
UQSHU-ǵa múshe memleketterdiń bitimgerlik kontıngentteri – arnaıy daıyndalǵan áskerı, mılısıalyq (polıseılik) jáne azamattyq personal, sondaı-aq olardan bólinetin kúsh-quraldar. Árbir bitimgerlik operasıada UQSHU Ujymdyq Qaýipsizdik Keńesiniń sheshimimen oryndalatyn mindetterdiń kólemine jáne shıelenis aımaǵyndaǵy naqty jaǵdaıǵa qaraı olardyń quramy, qurylymy men sany aıqyndalady.