Biraq ol úshin Ýkraınanyń kelisimi qajet
Ýkraınanyń shyǵysyndaǵy jaǵdaıdyń shıelenisýine baılanysty Ujymdyq qaýipsizdik týraly shart uıymy Donbasqa bitimgerler kúshterin attandyrý týraly usynys jasady, dep habarlaıdy Almaty-akshamy.kz «Habar 24» telearnasyna silteme jasap.
Bul týraly osy uıymnyń bas hatshysy Stanıslav Zas málimdedi. Onyń aıtýynsha, bul úshin Kıevtiń kelisimi men BUU Qaýipsizdik keńesiniń ruqsaty qajet. Uıym hatshysy qazir aımaqtaǵy shıelenisti beıbit jolmen báseńdetý qajet ekenin atap ótti. Aıta keteıik, Donbassqa halyqaralyq bitimgerlik kontıngentti ornalastyrý máselesi buǵan deıin de birneshe márte kóterilgen. Alaıda taraptar sheteldik áskerılerdi ornalastyrý boıynsha ortaq sheshimge kele almady.
«Donbassqa bitimgerlik kúshterdi attandyrýǵa bolady. Biraq bul úshin Ýkraınanyń kelisimi qajet. Óıtkeni bul sol eldiń aýmaǵy. Budan bólek BUU Qaýipsizdik Keńesiniń mandaty kerek jáne osy sheshimdi uıymǵa múshe elderdiń bári qoldaýy tıis»,-deıdi UQSHU bas hatshysy Stanıslav Zas.