Biz memlekettiń tutastyǵyn qorǵap qaldyq
QR Memlekettik hatshysy Erlan Qarın Ujymdyq qaýipsizdik týraly shart uıymynyń bitimgerlik kontıngentiniń daǵdarys aıaqtalǵannan keıin elderine qaıtatynyna senim bildirdi, dep habarlaıdy Almaty-akshamy.kz.
Bul týraly ol «Habar 24» telearnasyna bergen suhbatynda aıtty.
«Qatań, sheshimtal áreketter qabyldaý kerek boldy. Prezıdent osyndaı sheshimder qabyldady da. Ujymdyq qaýipsizdik týraly shart uıymynyń bitimgerlik kontıngentin tartý turaqsyzdyq ornatý josparyn buzyp, boldyrmaı tastady. Óıtkeni bitimgerlik kontıngentti shaqyrýdyń arqasynda quqyq qorǵaý organdary men armıanyń kúshterin kontrterrorıstik operasıany júrgizýge shoǵyrlandyrdy.
Biraq osy tóńirektegi saýaldarǵa aldyn ala jaýap bere otyryp, birden atap ótkim keledi. Bul týraly birneshe márte aıtyldy da. Biraq taǵy bir ret eske salyp, qaıtalaý kerek sıaqty. Bitimgerlik kontıngent tek strategıalyq nysandardy kúzetý fýnksıasyn ǵana oryndaıdy», - dedi Memlekettik hatshy.
Sondaı-aq, Erlan Qarın eldegi osy bir daǵdarys aıaqtalǵannan keıin syrttan kelgen áskerıler elderine qaıtatynyna senim bildirdi.
«Bitimgerlik kontıngent eldiń egemendigine nuqsan keltiredi degen áńgimelerdiń bári sóz ǵana. Eger memlekettiń tutastyǵy buzylǵan bolsa, qorǵaıtyn eshteńemiz de qalmaıtyn edi. Sondyqtan UQSHU-nyń bitimgerlik kontıngentin shaqyrý, kerisinshe, memlekettiń tutastyǵyn qorǵaýǵa kómektesti. Prezıdenttiń osy sheshimderiniń arqasynda biz elimizdi qorǵap qaldyq dep oılaımyn. Osyny ashyq aıtýymyz kerek. Biz tek qana tártipti qalpyna keltirgen joqpyz, memlekettiń tutastyǵyn qorǵap qaldyq. Biz tártipti qalypqa keltirdik degen sıaqty sózderdi aıtqanda, elde bolǵan jáne bolyp jatqan ahýaldyń sıpatyn tolyq bere almaımyz. Taıaqtyń bir ushynda tek tártipti qalypqa keltirý ǵana emes, memleketti saqtap qalý, qorǵap qalý máselesi turdy. Qańtardyń osynaý dramaǵa toly kúnderinde biz memlekettiligimizdi saqtap qala aldyq», - dedi Erlan Qarın.