Ulttyq qaýipsizdik komıtetiniń Shekara qyzmetiniń burynǵy dırektory Darhan Dilmanovqa qatysty úkim shyqty - ol 4 jylǵa bas bostandyǵynan aıyryldy, dep habarlaıdy almaty-akshamy.kz Áskerı sotqa silteme jasap.
Almaty garnızonynyń áskerı sotynyń habaryna qaraǵanda, Shekara qyzmetiniń eks basyshysy Dilmanov pen basqa da laýazymdy tulǵalar aýyr zardaptarǵa ákep soqtyrǵan bılikti asyra paıdalandy jáne iri mólsherde para aldy dep aıyptalǵan.
"D.E.Dilmanovqa QHR-dan Qazaqstanǵa júkterdi ótkizý pýnkti arqyly aýystyryp tıeýdiń ázirlengen qylmystyq sqemasy jáne ony engizýge járdemdesý qajettigi týraly aıtyldy. Aıtylǵan sqema sátti júrgizilse ol odan belgili bir tabys alatyny belgili boldy. Júkterdi ótkizý pýnkti arqyly QHR-dan QR-ǵa aýystyryp tıeýdiń quqyqqa qarsy sqemasyn engizý saldary (1750 aınalma reıs jasalǵan) úlken zalalǵa ákep soqty", - delingen sot habarlamasynda.
Sottalýshylardyń kinási kýágerlerdiń aıǵaqtary, áskerı-jarǵylyq zertteýler, saraptamalardyń qorytyndylary, qujattyq tekserýlerdiń aktileri arqyly dáleldengeni atap ótildi. Prokýror sottalýshylarǵa múlkin tárkilep, 4 jyldan 9 jylǵa deıingi merzimge bas bostandyǵynan aıyrý túrindegi jaza taǵaıyndaýdy surady. Dilmanov pen istiń basqa da qatysýshylary kinásin tolyq moıyndaǵany aıtylady, olar sottan jasaǵan isine ókinip, jazanyń jeńil túrin taǵaıyndaýdy, sondaı-aq jazanyń qosymsha túrlerin qoldanbaýdy suraǵan.
"Jasalǵan qylmystyń sıpaty men qoǵamdyq qaýip dárejesin eskere otyryp, sot D.Dilmanovqa qatysty Qylmystyq kodekstiń 450-babynyń 2-bóligi boıynsha múlki tárkilenip, 4 jylǵa bas bostandyǵynan aıyrý túrinde jaza taǵaıyndady. Dilmanovty "general-leıtenant" áskerı ataǵynan, memlekettik nagradasynan (İİ dárejeli "Aıbyn" ordeni) jáne "QR Ulttyq qaýipsizdik komıtetiniń ardageri" qurmetti ataǵynan aıyrý týraly prezıdentke usynys engizildi", - delingen sot habarynda.
Taǵy bir sottalýshyǵa 1,2 mln teńge para bergeni úshin 38 mln teńge aıyppul salyndy. Qalǵan sottalýshylarǵa múlki tárkilenbesten 3,5 jyldan 5,5 jylǵa deıin bas bostandyǵyn shekteý jazalary taǵaıyndaldy. Sottalǵandar ómir boıy memlekettik qyzmette qyzmet atqarý quqyǵynan aıyryldy.
Úkim zańdy kúshine engen joq.