Samat Ábish Qazaqstanda júr.
Tergeý amaldary aıasynda Samat Ábishten jaýap alynyp jatyr. Bul týraly QR Ulttyq qaýipsizdik komıteti tóraǵasynyń orynbasary Asqar Ámirhanov aıtty, dep habarlaıdy Almaty-akshamy.kz QazAqparatqa silteme jasap.
Alaıda ol tergeý amaldary barysynda Samat Ábish kúdikti nemese kýáger ekenin naqtylamady.
Asqar Ámirhanovtyń aıtýynsha, tergeý organdary Samat Ábishti jaýap berýge shaqyrtyp júr.
«Samat Ábish tergeý orbıtasynda. Ol jaýap berip jatyr. Onyń statýsyn bilmeımin jáne ol dál qazir Qazaqstanda ekenin bilemin. S.Ábishti ózim kórmedim. Meniń oıymsha, tergeý amaldary júrip jatyr. Ol sonda bolýy kerek», - dedi Asqar Ámirhanov Májiliste tilshiler saýalyna jaýap bere otyryp.
Budan buryn habarlanǵandaı, bıyl qańtar aıynda Memleket basshysynyń ókimimen Samat Satybaldyuly Ábish Qazaqstan Respýblıkasy Ulttyq qaýipsizdik komıteti tóraǵasynyń birinshi orynbasary laýazymynan bosatyldy.