Prokýratýranyń talap-aryzy boıynsha Almaty qalasy turǵynynyń qaıtys bolǵany týraly akti jazbasynyń kúshi joıyldy.
Almaty turǵyny jalǵan qujat saldarynan zardap shegip kelgen. Jalǵan qujat jasalý saldarynan ol qaıtys bolǵandar tizimine enip ketken, nátıjesinde kóptegen qıyndyqtarǵa tap bolǵan, prokýratýra mamandary onyń quqyǵyn qorǵap bergen, dep habarlaıdy Almaty-akshamy.kz.
Almaty qalalyq prokýratýrasynyń málimetinshe, Almaty qalasy turǵynynyń qaıtys bolǵany týraly akti jazbasynyń kúshi joıyldy.
Prokýrorlar A. esimdi azamatshaǵa tanysy jeke kýáligin jasap bergenin, biraq qujatqa óziniń fotosýretin japsyrǵanyn anyqtady.
Iaǵnı, anketalyq málimetterde azamatsha A. týraly jazylǵan. Al fotosýrette onyń qurbysy azamatsha B. bolǵan.
27.09.2021 jyly azamatsha B. aýrýhanada qaıtys bolǵan. Sol kezde Almaty qalasy Túrksib aýdandyq AHAJ jalǵan qujat negizinde onyń qaıtys bolǵany týraly akti jazǵan. Jalǵan qujattyń kesirinen A. esimdi áıel barlyq organdarda qaıtys bolǵan adam retinde esepte turǵan.
Mán-jaıdy anyqtaǵan Túrksib aýdanynyń prokýratýrasy ótinish berýshiniń múddesi úshin qaıtys bolý týraly akti jazbasyn kúshin joıý týraly talap-aryz berdi.
Sot qadaǵalaý organynyń talap-aryzyn qanaǵattandyrdy. Aktiniń kúshi joıyldy.
Osydan keıin resmı qujatty qoldan jasaý faktisi boıynsha polısıa qylmystyq is qozǵady.