Ol Oral qalasyndaǵy aeroklýbty aıaqtaǵannan keıin óz erkimen maıdanǵa attanyp, túngi bombalaýshy ushaqty basqarý isin meńgerip, 588-shi túngi bombalaýshy avıasıalyq polkke shtýrman-atqysh bolyp qabyldandy. Bul polktiń quramynda tek qyz-kelinshekterden quralǵan ushqyshtar toby qyzmet etken.
Jaýdyń úreıin ushyrǵan bul jaýynger áıelderge nemister «Túngi mystandar» degen ataý bergen. Qyzdar urys kezinde nysanaǵa belgili bir qashyqtyqta jaqyndap, ushaq qozǵaltqyshyn óshirip, tún tynyshtyǵyn tilip ótetin syzylta shyqqan únmen jaýǵa bomba tastaıtyn. Aspanda ushyp kele jatqan mystandaı áser qaldyratyn dybys qana estiletin. Al olardy kórý, ańǵarý múlde múmkin bolmaǵan.
Jaýynger qyzdar bir túnde 5-10 ret ushyp shyǵyp, jaý shebine soqqy beretin. Olar uzaq ýaqyt boıy parashútsiz ushqan. Sebebi, parashúttiń ornyna bomba kóbirek tıep, maıdandaǵy nátıjeli áreketti kúsheıtýdi maqsat tutqan. Tek 1944 jyly ǵana olar arnaıy buıryqpen parashútpen ushýǵa mindetteldi.
Hıýaz Dospanova jaýyngerlik tapsyrmalardy Ońtústik maıdanda, Soltústik Kavkazda, Zakavkazede, Ýkraına men Belarýs jerinde oryndady. Eki ret aýyr jaraqat alsa da, sapqa qaıta oralyp, soǵysty Berlın túbinde jeńispen qarsy aldy. Soǵysty İİ top múgedegi retinde aıaqtady.
Hıýaz Mánshúk pen Álıanyń rýhyn jalǵap, 300-den astam jaýyngerlik ushýǵa qatysyp, jaýǵa oısyrata soqqy bergen. Soǵys jyldarynda birneshe nagradamen marapattalǵan. Táýelsiz Qazaqstan onyń erligin joǵary baǵalap, 2004 jyly eldiń eń joǵary marapaty — «Halyq Qaharmany» ataǵyn berdi.