Jappaı egis jumystaryna daıyndyq jalǵasýda.
Qazaqstanda aǵymdaǵy jyldyń qańtar-naýryz aılarynda azyq-túlik ónimderiniń óndirisi 3,8%-ǵa ósip, 607,8 mlrd teńgeni qurady. Eń joǵary ósý qarqyny kókónisterdi óńdeýde, un men balyq óndirýde baıqaldy. Bul týraly búgin Úkimet otyrysynda Aýyl sharýashylyǵy mınıstri Erbol Qarashókeev málimdedi, dep habarlaıdy Almaty-akshamy.kz Eldala.kz silteme jasap.
«Qaıta óńdelgen jáne konservilengen kókónister óndirisiniń 1,8 esege (4,7 myń tonna), un óndirisi 23%-ǵa (881,4 myń tonna), jas, tońazytylǵan nemese muzdatylǵan balyq óndirisi 21,5%-ǵa (10,1 myń tonna), jarma 8,3%-ǵa (26,6 myń tonna), shujyq ónimderi 7,8%-ǵa (15 myń tonna), makaron ónimderi 5,3%-ǵa (39,7 myń tonna), ashyǵan sút ónimderi 2,6%-ǵa (57,7 myń tonna)», - dep habarlady ASHM basshysy.
Jalpy, jyl basynan beri aýyl sharýashylyǵynyń jalpy óniminiń kólemi 1,8%-ǵa artyp, 700,3 mlrd teńgeni qurady. Negizinen bul ósim mal sharýashylyǵy esebinen qamtamasyz etildi - 2%. Sonyń ishinde tiri salmaqta et óndirý 1,2%-ǵa, sút 1,3%-ǵa, taýyq jumyrtqasy 11,6%-ǵa artty.
Ósimdik sharýashylyǵy ónimi ótken jyldyń sáıkes kezeńine uqsas 42,8 mlrd teńge somasyna óndirildi.
Azyq-túlik ónimderi óndirisiniń negizgi kapıtalyna ınvestısıalar kólemi úsh aıda 35,8% - ǵa artyp, 34,1 mlrd teńgeni qurady.
Sonymen qatar, jappaı egis jumystaryna daıyndyq jalǵasýda. Energetıka mınıstri Bolat Aqsholaqovtyń aıtýynsha, kóktemgi egis jumystaryn ýaqytyly jáne turaqty júrgizý úshin agrarshylarǵa 212 myń teńge/tonna (176 teńge/lıtr) baǵamen 400 myń tonna dızel otyny bólingen. Bul bólshek saýda baǵasynan aımaqqa baılanysty orta eseppen 15-30%-ǵa tómen.