Túrki mádenıeti jáne murasy qory Ulytaý oblysy ákimdigimen birlese Qazaqstan Respýblıkasynyń Ulytaý oblysynda 2025 jyldyń 27-28 qyrkúıek kúnderi “Joshy han jáne Altyn Orda: tarıh, mura jáne Uly Dala órkenıeti taqyrybyndaǵy Halyqaralyq ǵylymı-tanymdyq konferensıasyn ótkizdi.
Konferensıanyń maqsaty – Joshy han murasyn jáne Altyn Orda tarıhyn ǵylymı turǵydan zerdeleý, tarıh, restavrasıa, fólklor, mýzykataný, ónertaný baǵyttaryndaǵy ǵylymı-zertteý jumystaryn keshendi túrde júrgizý, Ulytaý óńiri mádenıetindegi túrki tanymyna ortaq qundylyqtardy aıshyqtaý, tutas túrki órkenıetiniń rýhanı qazynasy retinde baǵalaý jáne qazirgi qoǵamdaǵy mánin aıqyndaý.
“Altyn Orda jáne Joshy ulysy kezeńindegi memlekettilik pen tarıhı-mádenı prosester” jáne “Hİİİ-XIV ǵasyrlardaǵy Túrki áleminiń mýzykalyq-fólklorlyq murasy men rýhanı qundylyqtary. Kúıshi-sazger Ketbuqa bıdiń tarıhı-mádenı murasy” taqyryptaryn qamtyǵan aýqymdy is-sharaǵa Ázerbaıjan, Qazaqstan, Qyrǵyzstan, Túrkıa, Ózbekstan, Tatarstan elderinen kelgen tarıhshy, fılolog, fólklortanýshy ǵalymdary qatysty.
Konferensıanyń plenarlyq otyrysynda Túrki mádenıeti jáne murasy qorynyń prezıdenti Aqtoty Raıymqulova, Ulytaý oblysynyń ákimi Dastan Ryspekov, Qazaqstan Respýblıkasynyń Mádenıet jáne aqparat mınıstrliginiń Mádenıet komıteti tóraǵasynyń orynbasary Maqsat Arǵynbekov sóz sóıledi. Aqtoty Raıymqulova konferensıa qatysýshylaryna alǵysyn bildirip, óz sózinde Joshy han murasy men Altyn Orda tarıhyn tereńinen zerdelenip, Ulytaý topyraǵyndaǵy tamyr jaıǵan túrkilik ortaq qundylyqtardy aıqyndaý búgingi kúnniń basty máseleleriniń biri ekendigine basa nazar aýdardy.
Sondaı-aq, is-shara aıasynda túrki halyqtarynyń rýhanı qundylyqtaryn ulyqtaǵan túrki mádenıetiniń ambassadoryatanǵan “TURAN” ansambliniń “TAMYR” atty konserti ótkizildi. Konsertke jınalǵan kórermen túrki áleminiń 40-tan asa ulttyq aspaptarynyń únimen tanysyp, halyq shyǵarmalarynyń áýezdi áýenine bólendi.
Sonymen qatar, joba aıasynda konferensıa qatysýshylaryna Joshy han, Alasha han, Dombaýyl keseneleri sıaqty Ulytaý óńiriniń kúlli túrki jurtyna ortaq tarıhı-mádenı oryndaryna saıahat uıymdastyryldy.