Keshe, 28 qyrkúıek "Real Madrıd" fýtbolshylary Madrıdten Almatyǵa tikeleı reıspen 8 saǵat ushyp kelgen bolatyn. Uzaq joldyń áseri men aldaǵy oıynǵa daıyndyq týraly suraqqa komanda bas bapkeri Habı Alonso jaýap berdi, dep habarlaıdy Aqshamnews.kz.
Ol oıynǵa daıyn ekenderin aıtty.
"Uzaq sapar, 7 myń shaqyrymnan asa joldy eńserý árıne, ońaı emes. Biraq bul biz úshin úırenshikti jaǵdaı. Biz únemi beıimdelýimiz kerek. Erteńgi machqa tyńǵylyqty daıyndalýymyz qajet. Al alystan kelgen joldy sharshadyq dep syltaý aıta almaımyz", – dedi bapker.
Habı Alonsonyń aıtýynsha, bastapqy quram oıynshylaryna demalys berý qarastyrylmaǵan.
"Qalaı bolǵanda da biz alańǵa shyǵamyz. «Qaıratqa» qarsy oınaýǵa daıyndaldyq. Olardyń Chempıondar lıgasyna alǵash shyǵyp turǵanyn bilemiz. Qarsylasty qysymǵa alyp, shabýylǵa jıi shyǵamyz. Óte qarqyndy mach bolǵaly tur. «Qaırattyń» uıymdasqan komanda ekenin bilemiz", – dedi ol.
Sonymen qatar bapker qazaqstandyq klýbtyń oıyndaryn muqıat baqylaǵanyn aıtty:
"Biz «Seltıkke» de, «Sportıngke» de qarsy ótken machtaryn kórdik. «Qaırattyń» kombınasıalyq oıyny bar, sonymen birge tikeleı shabýylǵa shyǵatyn sátterin de baıqadyq. Bul – myqty básekeles bola alatyn komanda ekenin kórsetti", – dedi Alonso.
Aıta keteıik, 30 qyrkúıek kúni Almatydaǵy Ortalyq stadıonda «Qaırat» pen «Real Madrıd» arasyndaǵy kezdesý ótedi.