Almatyda fýtboldan Chempıondar lıgasynyń toptyq kezeńindegi «Qaırat» pen «Real Madrıd» arasyndaǵy mach barysynda táýlik boıy medısınalyq baqylaý uıymdastyrylady. Bul týraly qalanyń Qoǵamdyq densaýlyq basqarmasy habarlady.
Osy maqsatta stadıon aýmaǵyna bes jedel járdem brıgadasy qoıylyp, árqaısysy kez kelgen jaǵdaıǵa jedel is-áreketke daıyn turady.
Almaty qalasy Qoǵamdyq densaýlyq basqarmasynyń málimetinshe, medısınalyq quram iri sporttyq jáne buqaralyq is-sharalarda tájirıbesi mol joǵary bilikti mamandardan jasaqtalǵan. Brıgadalar trıbýna mańynda jáne kireberis jaqta ornalasyp, uıymdastyrýshylarmen jáne qaýipsizdik qyzmetimen turaqty baılanysta bolady.
Uıymdastyrýshylardyń aıtýynsha, barlyq shara jankúıerlerdiń qaýipsizdigi men jaılylyǵyn qamtamasyz etýge baǵyttalǵan. Bul mach qonaqtarynyń Almatydaǵy osynaý jarqyn ári kópten kútken sporttyq oqıǵany alańsyz tamashalaýyna múmkindik beredi.