Megapolıstiń áıgili konsert zalynda ótken shara Táýelsizdigimizdiń 30 jyldyǵyna oraılastyrylǵan
Keshte qazaq shyǵarmalarymen qosa álem klasıkteriniń kompozısıalary oryndaldy. Ásirese, «Túrik marshy», «Ah, Ystambul» týyndylary jıylǵan jurttyń kóńilinen shyqty, dep habarlady Almaty-akshamy.kz 24.kz-ke silteme jasap.
Anadoly jerindegi tyńdarman Ulytaý tobynyń shyǵarmashylyǵymen etene tanys. Óıtkeni tól aspaptarymyz ben zamanaýı mýzykany alǵash bolyp ushtastyrǵan da osy Ulytaý.
«Ulytaý tobynyń shyǵarmalaryn jaqsy kóremin. Sondyqtan Ulytaýdyń konsert beretinin estip, basqa qaladan keldik. Konserttegi atmosferany aıtyp jetkize almaımyn. Tańǵajaıyp. Taǵy da kelsin. Jıi konsert bersin», - deıdi kórermen Aıshe Ýısal.
Sońǵy on kúnde Túrki áleminiń shyraǵy Ystambulda jandy. Túrki memleketteri uıymynyń segizinshi samıti ótip, oǵan memleket basshysy Qasym-Jomart Toqaev arnaıy bardy. Alqaly jıynda mańyzdy sheshimder qabyldanyp, «Túrki áleminiń keleshegi 2040» qujaty qabyldandy. Sondaı-aq alǵash ret Halyqaralyq Qorqyt Ata fılmi festıvali ótip, tamyrlas jurttyń belgili kınomotograftary megapolıste bas qosty. Bul da alyp shahardyń alystaǵy aǵaıynǵa degen súıispenshiliginiń belgisi bolsa kerek.