Memleket basshysynyń tapsyrmasy boıynsha «Zańsyz ıemdenilgen aktıvterdi memleketke qaıtarý týraly» Zańǵa sáıkes Arnaýly memlekettik qor qarajatynan qarjylandyrylatyn el óńirlerinde áleýmettik mańyzy bar jobalardy iske asyrý júzege asyrylýda, dep habarlaıdy aqshamnews.kz
Úkimet Ulytaý oblysy Jańaarqa aýdany Myńadyr stansasynda 80 oryndyq mektep salýǵa 1,2 mlrd teńgeden astam qarajat bólý týraly sheshim qabyldady.
Jumys istep turǵan mektep osy aımaqtaǵy jalǵyz bilim berý mekemesi bolyp sanalady. Ǵımarat 1981 jyly salyndy, 2000 jyldary qosymsha keńeıtildi. Búgingi tańda mektep shamadan tys tolǵan: jobadaǵy 60 orynnyń ornyna munda 123 oqýshy oqyp jatyr. Mektepte hımıa, bıologıa, fızıka jáne geografıa boıynsha zerthanalyq kabınetter, sport zaly, sheberhana, eńbek kabınetteri joq.
Qurylysty bastaý 2025 jyldyń I toqsanyna josparlanǵan. Jobany iske asyrý oqýshy oryndarynyń sanyn ulǵaıtýǵa múmkindik beredi jáne zamanaýı bilim berý talaptaryna sáıkes balalardy oqytý úshin qajetti qolaıly jaǵdaı jasaıdy.
Buǵan deıin Úkimet birqatar áleýmettik mańyzy bar jobalardy qarjylandyrý týraly sheshim qabyldaǵan bolatyn. Olardyń qatarynda Zerendi aýylynda (Aqmola oblysy) sport kesheni, Temirlan aýylynda (Túrkistan oblysy) mýzyka mektebi, Arqalyqta daryndy sportshy balalarǵa arnalǵan sport ortalyǵy, Astanada tirek-qımyl apparaty buzylǵan balalarǵa arnalǵan ońaltý ortalyǵy, Almatyda erekshe qajettilikteri bar adamdarǵa arnalǵan jattyǵý ortalyǵy, Aqtóbede erekshe balalarǵa arnalǵan arnaıy balabaqsha, Jamansor aýylynda (Atyraý oblysy) mektep, Rıdderdegi kópsalaly aýrýhana qurylysyn aıaqtaý, sondaı-aq Shymkentte «Saıram kómekshi mektep-ınternat-kolledji» keshenindegi jataqhana qurylysy sekildi jobalar bar.