QUB atynan dep taralyp jatqan jalǵan aqparatqa senbeýge shaqyrady.
Ulttyq Banktiń fırmalyq blankin paıdalanyp, azamattarǵa jalǵan qujat joldaýshy alaıaqtardyń kóbeıgen, dep habarlaıdy aqshamnews.kz
Bul týraly Ulttyq bank málimdeme taratty.
Bas bank málimdeýinshe, qaskóıler Ulttyq Bank atynan jibergen jalǵan hattarda alaıaqtardyń qurbany bolǵanyn habarlaıdy. Sóıtip, alaıaqtardan aqshany qaýipsiz túrde qaıtarý úshin jáne «klırıń prosedýrasynan ótýge baılanysty qarjy mindettemelerin» óteý úshin aqsha aýdarý kerek ekenin aıtady.
«QUB jeke tulǵalardyń shotyna qyzmet kórsetpeıtinin, qarjy quraldaryn saqtandyrmaıtynyn jáne halyqpen aqshalaı esep aıyryspaıtynyn eske salamyz. Internet alaıaqtary mundaı habarlamalardy WhatsApp mobıldi qosymshasy, elektrondyq poshta jáne áleýmettik jeliler arqyly taratady», – dep jazylǵan resmı habarlamada.
Osyǵan baılanysty Ulttyq Bank azamattardy saq bolýǵa, kúmándi shottarǵa aqsha aýdarmaýǵa, jalǵan habarlamalar men tekserilmegen qujattarǵa senbeýge shaqyrady.
Sondaı-aq, mundaı sqemalardy alaıaqtar quqyq qorǵaý organdary nemese Ulttyq Bank qyzmetkerleriniń atyn jamylyp júzege asyrýy múmkin ekenin eske salady. Olar muny «aýdarymdardy alaıaqtardan saqtandyrý prosedýrasy», qarjy uıymdaryndaǵy «alaıaqtardy ustaý», «arnaıy organdardyń tekserýi» nemese memlekettik organdardyń birlesken «arnaıy operasıalaryna» qatysý sıaqty túrli jalǵan proses retinde túsindirip, aldap soǵýy yqtımal.
Sondyqtan, ózińiz nemese tanysyńyz osyndaı alaıaqtyq sqemaǵa tap bolyp jatsańyz, aryz jazyp, quqyq qorǵaý organdaryna júginý joldaryn usynady. Keńes alý úshin QUB-tyń baılanys ortalyǵyna 1477 nómiri arqyly habarlasýǵa bolady.