Qazaqstannyń jańa saıası modelge ótý baǵytyndaǵy reformalary Ulybrıtanıa parlamentshilerimen kezdesýde talqylandy.
Lordtar palatasynyń ókilderi elimizdiń sýperprezıdenttik basqarý júıesinen myqty prezıdenttik-parlamenttik túrine ótý bastamalary boıynsha oılaryn ortaǵa saldy. Olar Qazaqstanda bolyp jatqan demokratızasıalaý úderisteri ekijaqty baılanysty jańa sapalyq deńgeıge kóteretinin jetkizdi, dep habarlaıdy Almaty-akshamy.kz Qazaqtv.com saıtyna silteme jasap.
Jıyn qos memleket arasyndaǵy dıplomatıalyq qarym-qatynastyń ornaǵanyna 30 jyl tolýy qarsańynda ótti.
«Men sońǵy jeti jyl kóleminde Qazaqstanǵa birneshe ret baryp, damý úderisteriniń kýási boldym. Reformalar ornatýǵa umtylysyn óz kózimmen kórdim. Eń basty másele - zań ústemdigi. Biz Qazaqstannyń tabysty bolǵanyn kórgimiz keledi», - dedi Ulybrıtanıa Parlamentiniń múshesi Lord Frensıs Mod.
«Men Qazaqstan dostarynyń qataryna endi qosylyp jatyrmyn. Búgin elderińiz týraly jańa aqparatpen tanysýǵa zor múmkindik aldym. Eki memleket arasyndaǵy qarym-qatynasty odan ári nyǵaıtýda óz úlesimdi qosýǵa nıettimin», - deıdi Ulybrıtanıa Parlamentiniń múshesi Ser Grem Stúart Bredı.