Almatyda uly kúıshi Qurmanǵazy Saǵyrbaıulynyń 200 jyldyǵyna arnalǵan «Saryarqa» atty konsert ótti.
Qurmanǵazy orkestriniń konsert zalynda ulttyq saz óneriniń jarqyn beınesi Qurmanǵazy Saǵyrbaıulynyń 200 jyldyǵyna arnalǵan «Saryarqa» atty konsert ótti. Kesh qonaqtary Qazaqstannyń eńbek sińirgen qaıratkeri Ardaq Isataeva, Halyqaralyq jáne Respýblıkalyq konkýrstardyń laýreattary Birjan Álıev, Azamat Shynarov, Ásel Alına jeke óner kórsetti.
Aıta ketken jón, bıyl Qurmanǵazy Saǵyrbaıulynyń 200 jyldyq mereıtoıy aıasynda respýblıkalyq deńgeıde QR Mádenıet jáne sport mınıstrliginiń qoldaýymen ulttyq orkestr aýqymdy is-sharalar men dáýlesker kúıshi atyndaǵy kil myqtylardy anyqtaıtyn respýblıkalyq konkýrs uıymdastyrady.
Buǵan deıin mundaı mereıtoı 2018 jyly IýNESKO kóleminde atap ótilgen. Alaıda, uly kúıshi Qurmanǵazy Saǵyrbaıulynyń dúnıege kelgen jyly týraly san túrli boljam men aqparlar aıtylýda. Keı derekkózderi 1806 jyl dese, keı jınaqtarda 1818 jyl dep kórsetilgen. Alaıda, Muhtar Áýezov atyndaǵy óner ýnıversıtetiniń zertteýlerine sáıkes, 1823 jyl dep bekitildi. Kúı atasy atanǵan Qurmanǵazy Saǵyrbaıuly – kúılerinde azattyqty ańsap, bostandyqty jyrlap ótken dara tulǵa. Qazaq ultynyń baı murasyn «Adaı», «Balbyraýyn», «Saryarqa» jáne taǵy basqa mazmundy, áserli, tereń maǵynaly fılosofıalyq kúılermen tolyqtyrdy.