Almatyda Uly Jeńistiń 80 jyldyǵyna arnalǵan tarıhı-rýhanı kezdesý ótti
Almaty qalasyndaǵy Ortalyqtandyrylǵan kitaphana júıesiniń №4 kitaphana-bólimshesinde Uly Jeńistiń 80 jyldyǵyna oraı «Uly Jeńiske – máńgilik taǵzym» atty tarıhı-rýhanı kezdesý uıymdastyryldy. Bul týraly Aqshamnews.kz saıty habarlaıdy.
Jıynnyń negizgi maqsaty – soǵys ardagerleriniń estelikteri arqyly jastarǵa beıbit ómirdiń qadirin uǵyndyrý, otansúıgishtik pen azamattyq jaýapkershilikke tárbıeleý.
Kezdesýge qatysqan soǵys jáne áskerı qyzmet ardagerleri óz ómirlerinen syr shertip, jas urpaqqa adamgershilik pen elge qyzmet etýdiń mańyzyn jetkizdi. Damansk oqıǵasynyń ardageri Ońǵarbek Sydyqbekov jastardy qıyn sátte de adamı qasıetti joǵaltpaýǵa úndedi:
«Jastardy Otan súıgishtikke, bilimge tárbıelep, qandaı jaǵdaı bolsa da adamgershilikti joǵaltpaýdy úıretý kerek», – dedi ol.
Aýǵan soǵysynyń ardageri Dýan Ýmarov ta óz qyzmet jolynan estelik aıtyp, el úshin qyzmet etýdiń qadiri týraly sóz qozǵady:
«Bizde atalarymyzdyń artynan júrip, basqa elge qyzmet ettik. 1973 jyly Kýba aralyǵynda boldym», – dedi ol.
İs-shara barysynda kitaphana qyzmetkerleri men uıymdastyrýshylar jastarmen ashyq dıalog quryp, olardyń el tarıhyna degen qyzyǵýshylyǵyn oıatýǵa tyrysty. Kezdesý jas urpaqtyń boıyna patrıottyq rýh pen ulttyq sana qalyptastyrýǵa baǵyttalǵan mazmundy ári maǵynaly shara retinde ótti.
«Uly Jeńiske – máńgilik taǵzym» atty tarıhı-rýhanı kezdesý – batyrlar erligi men beıbit ómirdiń qadirin dáripteýge arnalǵan taǵylymdy shara boldy. Mundaı kezdesýler óskeleń urpaqtyń elge degen súıispenshiligin arttyryp, ótkenge taǵzym etip, bolashaqqa jaýapkershilikpen qaraýǵa tárbıeleıdi.