Ulytaý, Almaty oblysy komandalary nege jarystan shyǵyp qaldy?
Keshe, 15 qyrkúıekte «Uly dala joryǵy» marafon-báıgesiniń onynshy kezeńi aıaqtaldy. Shabandozdar belgilengen marshrýttyń 950 shaqyrymyn basyp ótti.
Onynshy kezeń qorytyndysy boıynsha, Túrkistan oblysynyń komandasy jeńimpaz atandy. Bul joly mańǵystaýlyq shabandozdar máre syzyǵyna ekinshi bolyp kelse, Qostanaı oblysynyń komandasy úshinshi bolyp jetti. Ókinishke qaraı, bul kúni eki kún qatarynan jeńimpaz bolǵan Almaty oblysy komandasymen jáne Ulytaý «Kókbórilerimen» qoshtasýǵa týra keldi.
Marafonnyń bas tóreshisi Nadejda Kýpsovanyń aıtýynsha, Almaty oblysy komandasynyń bir aty 10-kezeńniń alǵashqy 50 shaqyrymynda boldyryp, komanda fınıshqa jete almapty. Al ulytaýlyq attyń aptap ystyqtan júrek soǵysy jıilep, qalypqa túsýi qıyndaǵan.
«Tańerteń Almaty oblysy atynyń shabysyna qarap-aq uzaqqa barmaıtynyn sezdik. Komanda músheleri ótinip qoımaǵan soń ári rasymen attyń jaǵdaıy jaqsaryp kele jatqan soń joryqqa shyǵýyna ruqsat berdik. Kóp ýaqyt ótpeı, at boldyryp qaldy. Sonymen qatar atalmysh komanda sońǵy eki kúnde qatty shapty. 2 kezńniń kýbogy buıyrǵanmen Túrkistanǵa deıin jete almady. Bul joryqta jeńiske jetý úshin aıla-tásil myqty bolý kerek. Ulytaý atyn veterınarlar 10-kezeńniń alǵashqy shaqyrymyn eńsergennen keıin muqıat tekserdi. Júrek soǵysynyń jıiligi joǵary boldy. Atqa zaqym keltirmeý úshin kelesi 50 shaqyrymǵa jibermedik», - dedi bas tóreshi N.Kýpsova.
Alda 4 kezeń, ıaǵnı 350 shaqyrym qaldy. 9 komanda 16 qyrkúıekte tańǵy saǵat 7:00-den bastap alǵashqy 50 shaqyrymdy eńserýge attanady. Túski astan soń 9-kezeńniń kezekti 50 shaqyrymyn baǵyndyrýy tıis. Sonymen komandalar aldynda 1050-inshi shaqyrymdy eńserý mindeti tur.
On kúnniń qorytyndysy boıynsha komandalardyń jalpy ýaqyty:
Mańǵystaý oblysy, 64 saǵat 53 mınýt 55 sekýnd
Qostanaı oblysy, 66 saǵat 31 mınýt 31 sekýnd
Aqtóbe oblysy, 67 saǵat 06 mınýt 56 sekýnd
Jetisý oblysy, 68 saǵat 26 mınýt 09 sekýnd
Astana qalasy, 70 saǵat 51 mınýt 00 sekýnd
Almaty qalasy, 72 saǵat 21 mınýt 31 sekýnd
Túrkistan oblysy, 75 saǵat 52 mınýt 35 sekýnd
Abaı oblysy, 75 saǵat 55 mınýt 54 sekýnd
Qaraǵandy oblysy, 83 saǵat 57 mınýt 04 sekýnd
Astana qalasy, Mańǵystaý, Jetisý, Qostanaı oblystarynyń shabandozdary da 650 shaqyrymdy júrip ótken tulparlarymen Túrkistanǵa deıingi 1300 shaqyrymdy eńsermek. Bul komandaǵa tóreshiler «Rekord» degen ataý berip, arnaıy 13-inshi komanda retinde tirkep, nátıjelerin kúndelikti belgilep otyr. «Rekord» komandasynyń jigitteri dittegen maqsatyna jetse, kelesi jylǵy joryqqa Gınnes rekordtar kitabynyń ókilderin shaqyrtý josparda bar.
«Uly dala joryǵy» respýblıkalyq marafon-báıgesiniń bas seriktesi – «Sport Qory» týrızm ındýstrıasy men sportty qoldaý qory.