Brıtanıalyq ánshiler uly Abaıdyń ánderin óz repertýaryna qosyp, konsertterinde aıtyp júr.
Óner adamdarynyń pikirinshe, aqynnyń mýzykalyq murasy melodıalyq jáne yrǵaqtyq turǵyda óte sátti shyqqan, dep habarlaıdy Almaty-akshamy.kz QazAqparatqa silteme jasap.
Jańa brıtanıalyq pop-sensasıa, ánshi ári avtor Smaılı (Smilee) «Kózimniń qarasy» ánin naqyshyna keltire aıtyp, tyńdarmanynyń zor yqylasyna bólenip júr. Názik daýysty oryndaýshy gıtaranyń súıemeldeýimen aǵylshyn tiline aýdarylǵan ándi keremet shyrqaıdy.
Smaılı - Londondaǵy oryndaýshylyq óner jáne tehnologıalar mektebiniń túlegi. Ol álemge áıgili Adel, Emı Ýaınhaýs jáne Keıt Nesh sıaqty ánshilermen qatar osy oqý ornynda kásibı bilim alǵan. Dál osy jerde, nebári 14 jasynda ol óziniń alǵashqy ánin eń jaqyn dosymen birge jazdy. Sodan beri onyń mýzyka jazýǵa jáne oryndaýǵa degen qushtarlyǵy artpasa, kemigen joq.
Smaılı Ulybrıtanıada jáne shetelde gastróldik saparlarǵa shyǵyp, jandy daýysta án aıtyp júrgende belgili mýzykalyq prodúser Denıs Ingoldsbıdiń nazaryna iligedi. Sóıtip onyń juldyzy tipti jarqyraı túsedi.
Qazir de jas ánshi konsertke shyqqan kezinde Abaıdyń «The Apple of My Eye» ánin aǵylshyn tilinde oryndap, kórermenderdiń kózaıymyna aınaldy.
Budan bólek opera ánshisi Djozefın Hotorn «Blessings on You» («Aıtym sálem, Qalamqas») ánin oryndap júr. Núkasl qalasynan shyqqan jas ánshi, aqyn jáne kompozıtor Annabel Pattınson bolsa, «Jelsiz túnde jaryq aı» ánin aǵylshynsha naqyshyna keltire oryndaıdy.
Ánderdiń ádebı aýdarmasyn áıgili shotland aqyny, profesor Djon Bernsaıd jasaǵan. Ony qazaqstandyq tarap sózbe-sóz tárjimamen qamtamasyz etip otyrǵan. Aqyn túpnusqaǵa barynsha jaqyn bolýǵa tyrysypty.
«Árıne, aýdarma degen ońaı jumys emes. Óte qıyn boldy. Biraq talap údesinen shyǵýǵa tyrystyq. Óıtkeni bul jobaǵa óz basym qatty qyzyqtym. Abaı óleńderiniń rıtmıkasyn joǵaltpaı, dálme-dál aýdarý basty talap boldy. Sonymen qatar uıqas jaǵyn da umytpaý kerek boldy. Mundaı óleńder aýdarylǵanda, ádette, bul strategıa qoldanylmaıdy», deıdi Djon Bernsaıd.