«Qanysh jáne ǵylymı maıdan» kitabynyń tanystyrylymy ótkizildi
«Ǵylym ordasy» ǵımaratynda QR Prezıdenti janyndaǵy QR Ulttyq ǵylym akademıasy Almaty qalasy ákimdiginiń qoldaýymen elimizdegi Ǵylym akademıasynyń negizin qalaýshy, kórnekti ǵalym, akademık Qanysh Imantaıuly Sátbaevtyń 125 jyldyǵyna oraı, «Otbasy hrestomatıasy» qoǵamdyq qorynyń arnaıy jobasymen shyqqan «QANYSH JÁNE ǴYLYMI MAIDAN» kitabynyń tanystyrylymy ótkizildi.
Ǵulama ǵalymǵa arnalǵan sharadaǵy kitaptyń tanystyrylymyna QR Parlamenti Senatynyń depýtaty Altynbek Nuhuly, Májilisiniń depýtaty Abzal Quspan, QR Prezıdentiniń janyndaǵy QR Ulttyq ǵylym akademıasynyń basqarma prezıdenti Aqylbek Kúrishbaev, Almaty qalalyq Qoǵamdyq damý basqarmasynyń basshysy Aıdar Esenbekov, Sátbaevtiń nemeresi, profesor Álıma Jarmaǵambetova, zıaly qaýym ókilderi men qoǵam qaıratkerleri, ǵalymdar, JOO oqytýshylary, stýdentter men BAQ ókilderi qatysty. Shaharda ótken shara aıasynda atalǵan kitaptan tys erterekte óte az taralymmen shyǵyp, ǵylymı aınalymǵa túsip úlgermegen, sondaı-aq qaıta basyp shyǵarýǵa ruqsat etilmegen «Bala Qanysh oqyǵan kitaptar» toptamasy, «Qanyshtyń jastyq shaǵy», «Jas Qanysh» pen «Qýǵyndalǵan Sátbaev» kitaptary da tanystyryldy.
Atalǵan eńbekterdiń qaıta jaryqqa shyǵýy qoǵamda mol suranysqa ıe ekenin bildiredi. Qazaqtyń mańdaıyna bitken akademıktiń bar bolmysy, shyrǵalań ómir joly, ǵylym jolyndaǵy janqıarlyq erligi ekzıstensıa saraptamasymen saralanyp, túgeldeı taldanǵan. Ǵylym akademıasynyń ashylýyna (1946 jyly) ashylýyna, onyń tarıhı jetistigine Sátbaaevtyń qosqan súbeli úlesi bar. Atalǵan eńbekterden sony ańǵarýǵa bolady. Zamandastary Muqtar Áýezov, Jumabaı Shaıahmetov, Shapyq Shókın, Shaqmardan Esenov, Ebineı Bóketov, Esmaǵambet Ysmaılov, Beısenbaı Kenjebaev syndy ǵalymdardyń sırek kezdesetin, buryn-sońdy jaryq kórmegen tyń derekteri qamtylyp, usynylǵan. Qazaq mádenıeti men tanymyna jáne ultshyl tulǵalardyń ómirine qyzyǵatyn barsha oqyrmanǵa arnalǵan.
«Ǵulama ǵalym, qoǵam qaıratkeri Qanysh Sátbaevtyń 125 jyldyǵyna oraı jaryqqa shyqqan «Qanysh jáne ǵylymı maıdan» kitaby – asa qundy dúnıe. Muny el ómirindegi eleýli oqıǵa deýge bolady. Qanysh Imantaıuly – qanshama qıyndyqqa qaramaı, ǵylym jolynda jankeshtilikpen eńbek etip, elimizdiń búgingi ınovasıalyq damý jolyna batyl da sara jol salǵan uly tulǵa. Sátbaev metalýrgıada ǵana emes, qazaq ádebıeti men fólklorynyń, mádenıeti men mýzykasynyń asqan bilgiri boldy. Myna eńbekterde osy ultymyzdyń baı murasy jan-jaqty aıtylady. Ultyn súıgen uly tulǵany ulyqtaý – ortaq paryzymyz. Almaty qalasynyń ákimdigi bul baǵyttaǵy sharalardy únemi qoldap keledi», – dedi Almaty qalalyq Qoǵamdyq damý basqarmasynyń basshysy Aıdar Esenbekov.