Ulttyq ulannyń «Ońtústik» óńirlik qolbasshylyǵyna qarasty áskerı bólimderinde 2025 jylǵy jańa oqý kezeńi bastaldy.
Qolbasshylyq basqarmasynyń ofıserlerimen, sondaı-aq, Almatydaǵy 5571 áskerı bóliminiń áskerı qyzmetshilerimen jáne sarbazdarmen alǵashqy tárbıelik sabaqty Astanadan arnaıy kelgen Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary, Halyq qaharmany general-maıor Qaırat Úmbetov júrgizdi.
Sabaq barysynda Ulttyq ulan Bas qolbasshysynyń bıylǵy oqý jylyna qoıǵan jaýyngerlik tapsyrmalaryn naqtylap ótti. Sondaı-aq, quqyqtyq tártip áskerindegi tárbıe jáne aqparattyq-ımıdjdik jumystardyń mańyzdylyǵyna erekshe toqtalyp ótti.
– Qazaqstan Respýblıkasy İshki ister mınıstriniń, Ulttyq ulan Bas qolbasshysynyń negizgi talaptarynyń biri – zańdylyq pen tártip. Ulttyq ulan áskerinde quqyq buzýshylyqqa jol joq. Bárimiz eń birinshi kezekte sarbazdardyń densaýlyǵy men amandyǵyn qamtamasyz etýimiz kerek. Bul ásker basshylyǵynyń talaby, Memlekt basshysy Qasym-Jomart Toqaev óziniń Joldaýynda osy máselege erekshe nazar aýdardy, – dedi Qaırat Jarylqasynuly.
Sonymen qatar, ol Ulttyq ulan áskeriniń elimizdiń órkendeýi hám tynyshtyǵy jolyndaǵy qosqan úlesin tilge tıek etti. Alǵashqy tárbıelik saǵattan keıin saptyq alańda sap túzegen ulandyqtar qarý-jaraq pen áskerı tehnıkany, sondaı-aq, áskerı múlikterdi durys qoldaný, kez kelgen mindetterdi atqarý kezinde qaýipsizdik is-sharalaryn qatań saqtaý boıynsha sabaqtarǵa tarasty.
Sabaqtar barysynda jeke quramǵa qyzmettik-jaýyngerlik áreketterdiń barlyq baǵyty boıynsha arnaıy daıyndalǵan beınerolıkter kórsetildi.
Jańa oqý jylynda qoǵamdyq tártip pen qaýipsizdikti qamtamasyz etý boıynsha ulandyqtardyń aldynda kóptegen jaýapty mindetter turǵany shegelendi.