Almatynyń Almaly aýdanynda sýmen qamtamasyz etý máselesi qalaı sheshilip jatyr
Almatynyń Almaly aýdanynda buryn ortalyqtandyrylǵan ınjenerlik komýnıkasıa bolmaǵan jeke sektorda sýmen jabdyqtaý jáne sý burý jelileriniń qurylysy aıaqtaldy, dep habarlaıdy aqshamnews.kz
Mańyzdy jobalardyń biri – Indýstrıalnaıa, Sıolkovskıı, Volhovskaıa jáne t.b. 12 kóshede sý qubyry jelilerin salý boldy. Búginde osy kóshelerdiń turǵyndary ortalyqtandyrylǵan sýmen jabdyqtaý jáne sý burý júıelerimen qamtamasyz etilgen.
Sonymen qatar, jobany júzege asyrý aıasynda uzyndyǵy 15 km bolatyn jańa káriz jelileri ornatyldy, olar 19 kósheni qamtıdy. Onyń 6 kóshesinde jeke sektordyń qurylysynan beri ortalyqtandyrylǵan káriz jelileri bolmaǵan. 2025 jyly qalǵan 13 kóshede jobany iske asyrý jalǵasady. Qabyldanǵan sharalardyń nátıjesinde 6,8 myń tutynýshy ortalyqtandyrylǵan ınjenerlik jelilermen qamtamasyz etiledi.
Tóle bı kóshesi men Volhovskaıa kóshesiniń qıylysyndaǵy sý qubyry sorǵy stansıasy da oıdaǵydaı jańartylyp, kúrdeli jóndeýden ótti. Buryn stansıa apatty jaǵdaıda bolǵan jáne onyń jabdyqtary 1992 jyldan beri jóndelmegen. Rekonstrýksıadan keıin 4 kópqabatty úıdiń 500-den astam turǵyny úzdiksiz sýmen qamtamasyz etildi.
Jalpy, Almaty qalasynyń ákimi Erbolat Dosaevtyń tapsyrmasymen 2024 jyldyń basynan beri 219 km jańa sý qubyry jáne káriz jelileri salynyp, 27,3 km bar jeliler jańartyldy, bul 60 myńǵy jýyq abonentti qamtýǵa múmkindik berdi. 2025 jyly 240 km sý qubyry jelisin salý jáne 48 km jelini jańǵyrtý josparlanǵan.