Qarjylyq monıtorıń agenttiginiń (QMA) Shymkent qalasyndaǵy departamenti Al-Farabı aýdany ákimi apparatynyń basshysy jáne onyń sybaılastaryna qatysty isti tekserýdi aıaqtady. Olar búdjet qarjysyn jymqyrdy dep aıyptalǵan.
QMA baspasóz qyzmetiniń habarlaýynsha:
- Ákim apparatynyń basshysy qyzmet babyn paıdalanyp, JSHS dırektory jáne quryltaıshysymen birge búdjet qarajatyn ysyrap etý josparyn júzege asyrǵan.
- Turǵyn úılerdiń aýlalaryn abattandyrýǵa arnalǵan qurylys materıaldarynyń baǵasyn ádeıi joǵary kórsetken.
- Qujattarǵa qoqys jáshikteri, shaǵyn besedkalar, átkenshekter, oıyn jáne trenajer keshenderi sıaqty zattardyń quny shamadan tys kórsetilgen.
- Jymqyrylǵan soma — 700 mln teńge.
Sonymen qatar, JSHS dırektory men quryltaıshysy salyq tóleýden jaltaryp, 194 mln teńge kóleminde bereshek jınaǵan. Bul qaryz qazirgi ýaqytta tolyqtaı óteldi.
Sot úsh aıyptalýshyny da segiz jylǵa bas bostandyǵynan aıyrdy. Alaıda, úkim áli zańdy kúshine engen joq.