Aǵymdaǵy jyldyń 6 qańtarynda Ulttyq ulanynyń Almaty qalasyndaǵy B.Momyshuly atyndaǵy 5571 áskerı bóliminiń jeke quramy qańtar oqıǵasy kezinde erlikpen qaza tapqan Aıbat Amanovtyń anasy Gúlnaz Álkenqyzymen kezdesti. İs-sharaǵa ulandyq sarbazdardan bólek Aıbat Amanovpen birge Otan aldyndaǵy boryshyn ótegen qarýlas dostary da qatysty.
Jınalǵandar aldymen bir mınýt únsizdikpen qaza tapqan sarbazdar Aıbat Amanov pen Madıar Qaısarovty eske aldy. Sodan keıin anasy Gúlnaz Álkenqyzyna sóz berildi.
- Osyndaı sharany uıymdastyryp otyrǵan Ulttyq ulan basshylyǵyna, 5571 áskerı bólimniń basshylyq quramyna alǵys aıtamyn. Ulym qyzmet atqarǵan Taldyqorǵan qalasyna arnaıy barǵan edim. Almatydaǵy 5571 áskerı bólimi – ulymdy osynda alǵash qarsy alǵan áskerı bólim. Áskerdegi ár sarbaz men úshin ulymdaı bolyp ketken, árqaısysy men úshin qymbat. Sizderdiń kózderińizge qarap, dúnıeden ótken ulymdy kórgendeı bolamyn. Qaıǵyly oqıǵalar qaıtalanbasyn, ár sarbaz úıine aman-esen oralsyn. El aman, jurt tynysh bolsyn, - dedi batyr Aıbattyń anasy.
Sondaı-aq, sóz sóıleý úshin minberge Aıbat Amanovtyń qyzmettes dosy Erjan shaqyryldy.
- Aıbat óte jaqsy jigit edi. Onymen bir rotada qyzmet etkenimdi maqtan tutamyn. Birde maǵan ol "Áskerde bir jyl bolasyń. Ýaıymdamaı óz ornyńdy tap. Sonda ásker qyzyqty ótedi",-degen bolatyn. Bir túsingenim, biz barlyǵymyz bir jaýyngerlik januıamyz, qıyndyq túskende bir-birimizden jaqyn adam bolmaıdy. Sondyqtan jigitter birlik kerek. Eshteńege alańdamaı qyzmetterińdi adal atqaryndar, - dedi ol.
Shara sońynda Aıbat Amanov týraly derekti fılm kórsetildi.
- Batyrdyń anasy, barsha Otanymyzdyń anasy. Biz áskerı bólim basshylyǵy atynan Sizdiń aldyńyzda bas ıemiz, bizdiń áskerı bólimniń esigi sizder úshin árdaıym ashyq, - dedi 5571 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary podpolkovnık Ulyqbek Qaraev.
İs-shara sońynda áskerı bólimniń basshylyǵy kelgen qonaqtarǵa estelik syılyqtar tabystap, alǵysyn bildirdi.