Jalpy bilim beretin mektepterde 7 652 pedagog-psıholog jumys isteıdi
Bilim jáne ǵylym mınıstrligi Senat depýtaty Dana Nurjigitovanyń pedagog-psıhologtardy daıarlaý týraly joldaǵan depýtattyq saýalyna jaýap berdi. Aıtýynsha, 2019 jylǵy 1 qyrkúıekten bastap ulttyq testileýden sátti ótken jaǵdaıda pedagog-psıhologterge pedagogıkalyq sheberlik sanaty beriledi jáne qosymsha aqy tólenedi, dep habarlaıdy Almaty-akshamy.kz Vaq.kz-ke silteme jasap.
Mınıstrlik málimetine sáıkes, jalpy bilim beretin mektepterde 7 652 pedagog-psıholog jumys isteıdi. Óńirlerde 1 876 psıhologıalyq qyzmet jumys isteıdi, onda 11 myńnan astam maman qyzmet atqarady.
«Bilim berý uıymdary Memlekettik bilim berý uıymdary qyzmetkerleriniń úlgi shtattaryna sáıkes pedagog-psıhologtiń shtat birlikterimen qamtamasyz etiledi. 2021-2023 jyldar aralyǵynda respýblıkalyq búdjet esebinen «Órleý» biliktilikti arttyrý ulttyq ortalyǵy» AQ bazasynda 97 672 mln teńge somasyna 1 535 pedagog-psıhologtyń biliktiligin arttyrý josparlanǵan. 2019 jylǵy 1 qyrkúıekten bastap ulttyq testileýden sátti ótken jaǵdaıda pedagog-psıhologterge pedagogıkalyq sheberlik sanaty beriledi jáne qosymsha aqy tólenedi (pedagog-sheberge – 50%; pedagog-zertteýshige – 40%; pedagog-sarapshyǵa – 35%; pedagog-moderatorǵa – laýazymdyq jalaqysynyń 30%-y)» – dedi BǴM vıse-mınıstri Bıbigúl Asylova.
Sonymen qatar bilim berý uıymdarynda psıhologıalyq qyzmet júıesin odan ári damytý úshin qolda bar derekter boıynsha qosymsha 6 900-den astam pedagog-psıholog qajet. Balanyń quqyqtaryn qorǵaýdy kúsheıtý, turmystyq zorlyq-zombylyqqa qarsy is-qımyl jáne jasóspirimder arasynda sýısıdtiń kóbeıýi máselelerin sheshý jónindegi 2020-2023 jyldarǵa arnalǵan jol kartasynyń sheńberinde memlekettik bilim berý uıymdary qyzmetkerleriniń úlgilik shtattaryna ózgerister engizý kózdelgen, bul pedagog-psıhologter shtatyn ulǵaıtýǵa múmkindik beredi.
«Jol kartasy sheńberinde pedagog-psıhologterdiń qyzmetin ádistemelik súıemeldeý boıynsha is-sharalar kózdelgenin atap ótý qajet. Jergilikti deńgeıde pedagog-psıhologterdiń qyzmetin ádistemelik súıemeldeýdi jáne úılestirýdi qamtamasyz etetin oqý-ádistemelik ortalyqtar jumys isteıdi. Pedagog-psıhologterdiń qyzmetin ádistemelik súıemeldeý bóliginde mınıstrlik sheteldik áriptestermen (UNICEF) jáne úkimettik emes uıymdarmen tyǵyz jumys júrgizip jatyr», – dedi vıse-mınıstr.
Onyń aıtýynsha, Y. Altynsarın atyndaǵy Ulttyq bilim akademıasynyń bazasynda Psıhologıa, tárbıeleý jáne tulǵany damytý ortalyǵy quryldy. Ortalyqtyń qyzmeti óńirlerdiń psıhologıalyq qyzmetterine jetekshilik etetin barlyq oqý-ádistemelik ortalyqty úılestirýge, sondaı-aq bilim berý uıymdarynyń pedagog-psıhologterin ádistemelik qamtamasyz etýge baǵyttalǵan.
Qazirgi ýaqytta mınıstrlik ortalyqpen birlesip óńirlik oqý-ádistemelik ortalyqtar men psıhologıalyq qyzmetterdiń jumysyn jetildirý boıynsha jumys júrgizýde, sondaı-aq óńirlerde is júzinde iske asyrý úshin Psıhologıalyq-pedagogıkalyq júıeniń monıtorıńi boıynsha biryńǵaı baǵdarlama ázirlenip jatyr.