Ustaz esimin ulyqtaý – ár adamnyń azamattyq paryzy.
QR Parlamenti Senatynyń tóraǵasy Máýlen Áshimbaev muǵalimderdi kásibı merekelerimen quttyqtady, dep habarlaıdy Almaty-akshamy.kz.
«Qurmetti ustazdar! Sizderdi búgingi kásibı merekelerińizben shyn júrekten quttyqtaımyn! Bul kún – ustazdardyń ult tárbıeleý jolyndaǵy eren eńbegine degen erekshe qurmettiń belgisi. Shyn máninde, urpaqtyń ulaǵatty da parasatty bolyp qalyptasýy muǵalimniń bergen bilimi men tálimine baılanysty. Sondyqtan ustaz esimin ulyqtaý – ár adamnyń azamattyq paryzy.
Pandemıa saldarynan bilim berý salasy aıtarlyqtaı zardap shekkeni belgili. Sol keleńsizdikterdi eńserý jolyndaǵy ustazdardyń qajyr-qaıratyn aıryqsha atap ótken jón. Osylaısha muǵalimderimiz óz qyzmetine degen adaldyqtyń ozyq úlgisin kórsetti. Qazirgi tańda memleket tarapynan ustazdarǵa áleýmettik qoldaý kórsetý jumystary keshendi túrde júrgizilip keledi.
Prezıdentimiz bıylǵy Joldaýynda pedagogterdiń jalaqysyn ósirý, olardyń biliktiligin arttyrý jáne básekege qabiletti maman bolýyna qajetti jaǵdaı jasaý boıynsha tıisti oryndarǵa naqty tapsyrmalar berdi. Memleket basshysy belgilep bergen osyndaı mindetterdiń nátıjeli iske asyrylýyn zańnamalyq turǵydan qamtamasyz etýge Parlament Senaty qashanda daıyn.
«Alty Alashtyń balasy bas qossa, tór – muǵalimdiki» dep Maǵjan Jumabaev aıtqandaı, ustazdar qaýymy qandaı qurmetke de laıyq. Sol sebepti, aldaǵy ýaqytta pedagog mamandarǵa, jalpy bilim berý isine júıeli qoldaý kórsetý isi jalǵasa beredi. Búgingi tól merekelerińizben quttyqtaı otyryp, Sizderge zor densaýlyq, uzaq ǵumyr, tolaıym tabys jáne amandyq tileımin! Jetistigimen qýantar shákirtterińiz kóp bolsyn!», dep jazdy Senat tóraǵasy óziniń Facebook áleýmettik jelisindegi paraqshasynda.