Bul qyzmetke Islambek Saljanov saılandy.
Qazaq ulttyq sport túrleri qaýymdastyǵyna jańa basshy keldi, dep habarlaıdy Almaty-akshamy.kz Mádenıet jáne sport mınıstrligine silteme jasap.
Qazaq ulttyq sport túrleri qaýymdastyǵynyń jańa prezıdenti bolyp belgili kásipker jáne mesenat, Altyn Qyran Foundation qoǵamdyq qory qamqorshylyq keńesiniń tóraǵasy Islambek Saljanov saılandy. Bul týraly Qaýymdastyq quryltaıshylarynyń onlaın jáne oflaın formatta ótken jınalysy barysynda belgili boldy.
Aıta keteıik, Qazaq ulttyq sport túrleri qaýymdastyǵy kókpar, aýdaryspaq, báıge, jamby atý, teńge ilý, toǵyzqumalaq jáne t.b. sport túrlerin biriktiredi. Buǵan deıin uıymdy Bekbolat Tileýhan basqarǵan bolatyn.
«Táýelsizdik jyldarynda ulttyq sport túrlerin nasıhattaý jáne damytý baǵytynda aıtarlyqtaı jumys atqaryldy. Jarystar respýblıkalyq jáne halyqaralyq deńgeıde ótkizildi, qajetti ınfraqurylym paıda boldy. Búginde Qaýymdastyq aldynda jańa mindetter tur, olarǵa qol jetkizý úshin barlyq taraptardyń kúsh-jigerin biriktirý qajet», – dedi jıyn barysynda Mádenıet jáne sport mınıstri Dáýren Abaev.
Óz kezeginde Islambek Saljanov jıynǵa qatysýshylarǵa senim bildirgeni úshin alǵys aıtty.
«Bizdiń qaýymdastyq balalar sportyna erekshe nazar aýdarýy qajet. Buǵan qosa, ulttyq sport standarttaryn bekitip, jańa formattardy engizýdi josparlap otyrmyz. Máselen, ulttyq at sportyn jańǵyrtý óte mańyzdy», – dedi Islambek Saljanov.
Qatysýshylar qaýymdastyqtyń burynǵy basshylyǵy atqarǵan jumystardy jáne ulttyq sport túrlerin damytýǵa qosqan úlesin erekshe atap ótti.
Sondaı-aq quryltaıshylardyń jalpy jınalysy barysynda Ulttyq sport qaýymdastyǵynyń 2019-2022 jyldary atqarǵan qyzmeti týraly esep tyńdalyp, birlestiktiń jańa basshylyq quramy saılandy.
